പലതവണ കയറിയിറങ്ങിയിട്ടും നടപടിയില്ല മധ്യവയസ്കൻ വില്ലേജ് ഓഫീസിനു തീയിട്ടു
കൊച്ചി ആന്പല്ലൂർ വില്ലേജ് ഓഫീസിൽ ഇന്നു രാവിലെ യാണ് സംഭവം നടന്നത്.കാഞ്ഞിരമറ്റം പാലകുന്നുമല ചക്കാലയ്ക്കൽ രവി എന്നയാളാണ് ഓഫീസിനുള്ളിൽ തീയിട്ടത്. വില്ലേജ് ഓഫീസിലെ ചില ജീവനക്കാരുമായി മാസങ്ങളായി നിലനിന്നിരുന്ന തർക്കമാണു സംഭവത്തിനു പിന്നിലെന്നാണു പുറത്തുവരുന്ന വിവരങ്ങൾ. ജീവനക്കാർ രാവിലെ എത്തിയപ്പോൾ, ഓഫീസിനു മുന്നിൽ കാത്തിരുന്ന രവി വേഗത്തിൽ ഓഫീസിനുള്ളിൽ പ്രവേശിച്ച് മേശപ്പുറത്ത് വച്ചിരുന്ന ഫയലിലേക്ക് പെട്രോളൊഴിച്ച് തീകൊളുത്തുകയായിരുന്നു. സംഭവംകണ്ട ജീവനക്കാർ ഉടൻ തീയണച്ചു. മറ്റ് നാശനഷ്ടങ്ങളൊന്നും ഉണ്ടായിട്ടില്ല.സംഭവമറിഞ്ഞ് സ്ഥലത്തെത്തിയ പോലീസ് ഇയാളെ കസ്റ്റഡിയിലെടുത്തു. തഹസിൽദാരും ഫയർഫോഴ്സും സ്ഥലത്തെത്തി.