ഏഷ്യ കപ്പ് ട്വന്റി-20 ക്രിക്കറ്റിന് ഇന്ന് തുടക്കം
ഏഷ്യ കപ്പ് ട്വന്റി-20 ക്രിക്കറ്റിന് ഇന്ന് തുടക്കം. ട്വന്റി-20 ലോകകപ്പ് പോരാട്ടത്തിനു മുന്പുള്ള ഏഷ്യൻ ബലാബലമാണ് ഇന്നു മുതൽ അരങ്ങേറുക. ഉദ്ഘാടന മത്സരത്തിൽ ശ്രീലങ്കയും അഫ്ഗാനിസ്ഥാനും കൊന്പുകോർക്കും. ഇന്ത്യൻ സമയം ഇന്ന് രാത്രി 7.30ന് ദുബായ് ഇന്റർനാഷണൽ സ്റ്റേഡിയത്തിലാണ് മത്സരം.
15-ാമത് ഏഷ്യ കപ്പ് പോരാട്ടത്തിനാണ് ഇന്നു മുതൽ ടോസ് വീഴുക. 2020 സെപ്റ്റംബറിൽ നടക്കേണ്ടിയിരുന്ന ഏഷ്യ കപ്പ് പോരാട്ടം കോവിഡ് മഹാമാരിയെ തുടർന്ന് നീട്ടിവയ്ക്കുകയായിരുന്നു. ടൂർണമെന്റിന് ആദ്യം ആതിഥേയത്വം വഹിക്കാൻ എത്തിയത് പാക്കിസ്ഥാനായിരുന്നു. പിന്നീട് അത് ശ്രീലങ്കയിലേക്ക് മാറ്റി. 2022 ജൂലൈയിൽ ശ്രീലങ്ക അസൗകര്യം അറിയിച്ചതോടെയാണ് ഏഷ്യ കപ്പ് യുഎഇയിൽ എത്തിയത്. സാന്പത്തിക രാഷ്ട്രീയ പ്രതിസന്ധിയായിരുന്നു ശ്രീലങ്ക പിന്മാറാൻ കാരണം.