തിരഞ്ഞെടുപ്പ് നടത്തിപ്പില് ഗുരുതര വീഴ്ച; അന്വേഷിക്കണമെന്ന് പ്രതിപക്ഷ നേതാവ് വി ഡി സതീശന്
സംസ്ഥാനത്ത് സുതാര്യവും നീതിപൂര്വവുമായി വോട്ടെടുപ്പ് നടന്നില്ലെന്ന് ചൂണ്ടിക്കാട്ടി പ്രതിപക്ഷ നേതാവ് വി ഡി സതീശന് കേന്ദ്ര തിരഞ്ഞെടുപ്പ് കമ്മീഷന് പരാതി നല്കി. തിരഞ്ഞെടുപ്പ് നടത്തിപ്പിലുണ്ടായ ഗുരുതര വീഴ്ചകളെ കുറിച്ച് അന്വേഷിക്കണമെന്നും പരാതിയില് ആവശ്യപ്പെട്ടു. രണ്ട് വോട്ടുകള്ക്കിടയിലെ കാലതാമസം പല ബൂത്തുകളിലും പ്രശ്നങ്ങള് സൃഷ്ടിച്ചു. കനത്ത ചൂടില് മണിക്കൂറുകളോളം കാത്ത് നിന്നിട്ടും വോട്ട് ചെയ്യാനാകാതെ നിരവധി പേര് മടങ്ങിയ സംഭവങ്ങളുണ്ടായി.
വൈകീട്ട് ആറ് മണിക്ക് മുമ്പ് ബൂത്തില് എത്തിയ നിരവധി പേര്ക്ക് വോട്ട് ചെയ്യാനാകാത്ത സാഹചര്യവും പല സ്ഥലങ്ങളിലുമുണ്ടായി. സംസ്ഥാനത്ത് ഇത്രയും മോശമായ രീതിയില് തിരഞ്ഞെടുപ്പ് നടന്നിട്ടില്ല. ഇരട്ട വോട്ടുകളും മരണപ്പെട്ടവരുടെ വോട്ടുകളും ഒഴിവാക്കി വോട്ടേഴ്സ് പട്ടിക പരിഷ്ക്കരിക്കുന്നതിലും സംസ്ഥാന തിരഞ്ഞെടുപ്പ് കമ്മീഷന് പരാജയപ്പെട്ടു.
തിരഞ്ഞെടുപ്പ് നടത്തിപ്പിലുണ്ടായ ഗുരുതര വീഴ്ചകളെ കുറിച്ച് സ്വതന്ത്രമായ അന്വേഷണം നടത്തണമെന്നും പ്രതിപക്ഷ നേതാവ് പരാതിയില് ആവശ്യപ്പെട്ടു. സംസ്ഥാനത്തെ വിവിധ ബൂത്തുകളില് വോട്ടിങ്ങ് മന്ദഗതിയിലായ സംഭവത്തില് വിവിധ യുഡിഎഫ് നേതാക്കള് വ്യാപക ആക്ഷേപം ഉന്നയിച്ചിരുന്നു. ഇതിനിടെയാണ് പ്രതിപക്ഷ നേതാവ് കേന്ദ്ര തിരഞ്ഞെടുപ്പ് കമ്മീഷന് പരാതി നല്കിയത്.