കെവിൻ കൊലപാതക കേസ് : തെളിവെടുപ്പിനിടെ നാട്ടുകാരുടെ പ്രതിഷേധം
കെവിൻ കൊലക്കേസിൽ തെളിവെടുപ്പിനിടെ നാട്ടുകാരുടെ പ്രതിഷേധം. കേസിലെ നാല് പ്രതികളെ തെളിവെടുപ്പിനായി തെൻമലയ്ക്കു സമീപം ചാലിയേക്കരയിൽ എത്തിച്ചപ്പോഴാണ് നാട്ടുകാർ പ്രതിഷേധവുമായി രംഗത്തെത്തിയത്. പ്രതിഷേധം മുന്നിൽകണ്ട് കൊട്ടാരക്കര റൂറൽ എസ്പിയുടെ നേതൃത്വത്തിൽ വൻ സുരക്ഷയാണ് പ്രദേശത്ത് ഒരുക്കിയിരുന്നത്.
അതേസമയം കെവിനെ ചാലിയേക്കരിയിൽവച്ച് റോഡിൽനിന്നു താഴേക്ക് തള്ളിയിട്ടെന്ന് പ്രതികളായ നിയാസും റിയാസും തെളിവെടുപ്പിനിടെ പോലീസിനു മൊഴി നൽകി. കെവിൻ അവശനായിരുന്നുവെന്നും അദ്ദേഹം ഉരുണ്ട് താഴെപ്പോയെന്നും പ്രതികൾ പോലീസിനോട് പറഞ്ഞു.
ഐജി വിജയ് സാഖറെയുടെ നേതൃത്വത്തിൽ കോട്ടയത്തുനിന്ന് പ്രതികളെ തെന്മലയിൽ എത്തിച്ചാണ് തെളിവെടുപ്പ് നടത്തുന്നത്. ചാലിയേക്കര തോട്ടിൽനിന്നുമാണ് കെവിന്റെ മൃതദേഹം കണ്ടെത്തിയത്.