ഇന്ത്യയിലെ ഏറ്റവും മൂല്യമുള്ള കമ്പനിയായി റിലയന്‍സ് ഇന്‍ഡസ്ട്രീസ്
ഇന്ത്യയിലെ ഏറ്റവും മൂല്യമുള്ള കമ്പനിയായി മുകേഷ് അംബാനിയുടെ ഉടമസ്ഥതയിലുള്ള റിലയന്‍സ് ഇന്‍ഡസ്ട്രീസ്. വെള്ളിയാഴ്ച റിലയന്‍സിന്‍റെ വിപണിമൂലധനം 9 ലക്ഷം കോടി കടന്നു. റിലയന്‍സ് ഓഹരികള്‍ രണ്ട് ശതമാനം നേട്ടത്തോടെ 1428ല്‍ എത്തിയതോടെയാണ് കമ്പനിയുടെ വിപണിമൂലധനം കുതിച്ച്‌ കയറിയത്.
8.61 ലക്ഷം കോടി വിപണിമൂലധനമുള്ള ടാറ്റ കണ്‍സള്‍ട്ടന്‍സി സര്‍വീസാണ് രണ്ടാം സ്ഥാനത്ത്. 7 ലക്ഷം കോടിയോടെ എച്ച്‌.ഡി.എഫ്.സി ബാങ്കാണ് വിപണിമൂലധനത്തില്‍ മൂന്നാം സ്ഥാനത്ത്.
സാമ്പത്തിക വര്‍ഷത്തിന്‍റെ ഒന്നാം പാദത്തില്‍ റിലയന്‍സിന്‍റെ ലാഭം 6.8 ശതമാനം വര്‍ധിച്ചിരുന്നു. 10,104 കോടിയായിരുന്നു റിലയന്‍സിന്‍റെ ഒന്നാം പാദ ലാഭം.
രണ്ടാം സ്ഥാനത്തുള്ള ടിസിഎസിന്‍റെ ഇപ്പോഴത്തെ വിപണി മൂലധനം 7.66 ലക്ഷം കോടി രൂപയാണ്. എട്ട് ലക്ഷം കോടി രൂപ പിന്നിടുന്ന രണ്ടാമത്തെ കമ്പനികൂടിയാണ് ടിസിഎസ്.
രണ്ടാം പാദത്തില്‍ നികുതികഴിച്ചുള്ള റിലയന്‍സിന്‍റെ ലാഭത്തില്‍ 6-12 ശതമാനംവരെ വര്‍ധനവുണ്ടാകാമെന്നാണ് വിപണിയില്‍നിന്നുള്ള വിലയിരുത്തല്‍. ജിയോയും റീട്ടെയില്‍ ബിസിനസുമാണ് കമ്പനിയുടെ ലാഭത്തില്‍ വര്‍ധനവുണ്ടാക്കിയത്.
2019 കലണ്ടര്‍ വര്‍ഷത്തില്‍ റിലയന്‍സിന്‍റെ ഇതുവരെയുള്ള ഓഹരി വിലയിലെ നേട്ടം 28 ശതമാനമാണ്.
