ലതികാ സുഭാഷ് സ്വതന്ത്രയായി മത്സരിച്ചേക്കും: പ്രഖ്യാപനം ഇന്ന്
നിയമസഭാ തെരഞ്ഞെടുപ്പില്‍ സീറ്റ് നിഷേധിച്ചതില്‍ പ്രതിഷേധിച്ച്‌ തല മുണ്ഡനെ ചെയ്ത മുതിര്‍ന്ന കോണ്‍ഗ്രസ് നേതാവ് ലതിക സുഭാഷ സ്വതന്ത്രയായി മത്സരിച്ചേക്കുമെന്ന് റിപ്പോര്‍ട്ട്. ഏറ്റുമാനൂരില്‍ സ്വതന്ത്ര സ്ഥാനാര്‍ഥിയായി മത്സരിച്ചേക്കുമെന്നാണ് റിപ്പോര്‍ട്ട്.
ഇതിനു മുന്നോടിയായി അഭിപ്രായ സ്വരൂപീകരണത്തിന് തന്നോട് അടുപ്പമുള്ള പാര്‍ട്ടി പ്രവര്‍ത്തകരുടെ യോഗം ലതിക വിളിച്ചിട്ടുണ്ട്. മത്സരിക്കുന്നതിന് മുന്നോടിയായി കോണ്‍ഗ്രസ് പ്രാഥമികാംഗത്വം അവര്‍ രാജി വച്ചേക്കുമെന്നാണ് വിവരം.
ഇനി സീറ്റ് നല്‍കാമെന്ന് പറഞ്ഞാലും മത്സരിക്കാനില്ല. സ്ഥാനാര്‍ത്ഥി പ്രഖ്യാപനത്തിന് മുന്‍പ് കെപിസിസി അധ്യക്ഷനെ അടക്കം വിളിച്ചിരുന്നു. എന്നാല്‍ അവര്‍ ആരും ഫോണ്‍ പോലും എടുത്തില്ല. സ്ത്രീകള്‍ക്കുവേണ്ടിയാണ് മുന്നോട്ടുപോകുന്നത്. ഏറ്റുമാനൂര്‍ സീറ്റ് വിട്ടുകൊടുത്തതില്‍ കോണ്‍ഗ്രസ് നേതാക്കള്‍ക്ക് തന്നെ പങ്കുണ്ട്. അതിനാലാണ് ഇത്തരമൊരു നിലപാട് എടുത്തതെന്നും ലതികാ സുഭാഷ് പറഞ്ഞു.
കൂടിയാലോചനകള്‍ക്ക് ശേഷം ഇന്ന് വൈകിട്ട് ഇതു സംബന്ധിച്ച്‌ പ്രഖ്യാപമുണ്ടായേക്കുമെന്നാണ് സൂചന. നേരത്തെ, കോണ്‍ഗ്രസ് സ്ഥാനാര്‍ഥി പട്ടിക പ്രസിദ്ധീകരിച്ചതിനു പിന്നാലെ ലതിക സുഭാഷ് ശക്തമായ പ്രതിഷേധവുമായി രംഗത്തെത്തിയിരുന്നു. കെപിസിസി ആസ്ഥാനത്തിന് മുന്നില്‍ വച്ച്‌ തല മുണ്ഡനം ചെയ്തായിരുന്നു അവര്‍ പ്രതിഷേധം അറിയിച്ചത്.
