കൊറോണ വൈറസ്: ചൈനയില്നിന്ന് തിരിച്ചെത്തിയവര് സ്വമേധയാ ചികിത്സ തേടണമെന്ന് ആരോഗ്യ മന്ത്രി
തൃശൂര്: കൊറോണ വൈറസ് ബാധയില് സംസ്ഥാനത്തുടനീളം നിരീക്ഷണത്തിലുള്ളവര് ആരോഗ്യവകുപ്പ് നല്കിയ നിര്ദ്ദേശങ്ങള് കര്ശനമായി പാലിക്കണമെന്ന് മന്ത്രി കെകെ ശൈലജ . വൈറസ് ബാധിത പ്രദേശത്ത് നിന്ന് മടങ്ങിയെത്തിയവര് പൊതുകൂട്ടായ്മകളില് പങ്കെടുക്കുന്നത് തല്കാലം ഒഴിവാക്കണമെന്നും ആരോഗ്യ മന്ത്രിയുടെ നിര്ദ്ദേശത്തില് പറയുന്നു.
സംസ്ഥാനത്തെ സ്വകാര്യ ആശുപത്രികള്ക്കും ജാഗ്രതാ നിര്ദേശം നല്കിയിട്ടുണ്ടെന്ന് മന്ത്രി വ്യക്തമാക്കി . തൃശൂര് ജില്ലയില് നടന്ന അവലോകന യോഗത്തിനു ശേഷം മാധ്യമങ്ങളോട് സംസാരിക്കുകയായിരുന്നു കെ.കെ.ശൈലജ.
സ്വകാര്യ ആശുപത്രികളെയും പ്രതിരോധ പ്രവര്ത്തനങ്ങളുടെ ഭാഗമാക്കും. സ്വകാര്യ ആശുപത്രികളില് ഐസൊലേഷന് വാര്ഡുകള് സജ്ജീകരിക്കുമെന്നും രോഗലക്ഷണങ്ങള് ശ്രദ്ധയില്പ്പെടുന്നവര് കൂട്ടായ്മകളില് നിന്നും മാറി നില്ക്കാന് ശ്രദ്ധിക്കണമെന്നും മന്ത്രി നിര്ദേശിച്ചു.
വൈറസ് ബാധയില് ജനങ്ങള് ഭയപ്പെടേണ്ട സാഹചര്യമില്ലെന്ന് പറഞ്ഞ മന്ത്രി ആരോഗ്യവകുപ്പ് ആവശ്യമായ മുന്കരുതല് നടപടികളെല്ലാം സ്വീകരിച്ചിട്ടുണ്ടെന്നും വ്യക്തമാക്കി. അതേസമയം, ചൈനയില്നിന്ന് തിരിച്ചെത്തിയ ചിലര് കാര്യത്തിന്റെ ഗൗരവം മനസിലാക്കാതെ ഇപ്പോഴും അവരുടെ വിവരങ്ങള് ആരോഗ്യവകുപ്പിന് നല്കിയിട്ടില്ലെന്ന് മന്ത്രി പറഞ്ഞു . ഇത്തരക്കാര് എത്രയും വേഗം സ്വമേധയാ ആശുപത്രികളില് ചികിത്സ തേടണമെന്നും അവര് നിര്ദ്ദേശിച്ചു .
വീടുകളില് നിരീക്ഷണത്തില് കഴിയുന്നവര് നിര്ബന്ധമായും 28 ദിവസം വരെ നിരീക്ഷണത്തില് തുടരണം. ഇത്തരത്തില് നിരീക്ഷണത്തിലുള്ളവര്ക്ക് എന്തെങ്കിലും തരത്തിലുള്ള ജീവിത പ്രയാസങ്ങളുണ്ടെങ്കില് അത് പരിഹരിക്കാന് ധാരാളം വളണ്ടിയര്മാരും ആരോഗ്യപ്രവര്ത്തകരും എല്ലായിടത്തും സേനവനത്തിനുണ്ടെന്നും മന്ത്രി അറിയിച്ചു .
അതേസമയം, കൊറോണ ബാധ സംബന്ധിച്ച് വ്യാജ വാര്ത്തകളോ സന്ദേശങ്ങളോ പ്രചരിപ്പിക്കരുതെന്നും അത്തരം സംഭവങ്ങള് ശ്രദ്ധയില്പ്പെട്ടാല് കര്ശന നടപടികള് സ്വീകരിക്കുമെന്നും മന്ത്രി അറിയിച്ചു.