യുഎപിഎ അറസ്റ്റ്: പ്രതികളുടെ ജാമ്യാപേക്ഷ ബുധനാഴ്ച പരിഗണിക്കും
കോഴിക്കോട്: മാവോയിസ്റ്റ് ബന്ധം ആരോപിച്ച് കോഴിക്കോട് രണ്ട് വിദ്യാര്ഥികളെ അറസ്റ്റ് ചെയ്ത സംഭവത്തില് പോലീസ് പ്രോസിക്യൂഷന് റിപ്പോര്ട്ട് കൈമാറി. യു.എ.പി.എ നിലനിര്ത്തിയാണ് പോലീസ് റിപ്പോര്ട്ട് കൈമാറിയിരിക്കുന്നത്.അതേസമയം പ്രതികളുടെ ജാമ്യാപേക്ഷ പരിഗണിക്കുന്നത് കോടതി മാറ്റി വെച്ചു. ബുധനാഴ്ചത്തേക്കാണ് ജാമ്യാപേക്ഷ പരിഗണിക്കുന്നത് നീട്ടിയത്.
അറസ്റ്റിലായ രണ്ടു പ്രതികള്ക്കുമെതിരേ യുഎപിഎ നിലനില്ക്കുമെന്ന് പ്രോസിക്യൂഷന് വാദിച്ചു. അതേസമയം, യുവാക്കള്ക്കെതിരേ യുഎപിഎ ചുമത്തിയത് ശരിയല്ലെന്ന് പ്രതിഭാഗം ചൂണ്ടിക്കാട്ടി. പിടിയിലായവര്ക്ക് ക്രിമിനല് പശ്ചാത്തലമില്ല. ഇവരുടെ ഭാവി ഇല്ലാതാക്കുന്ന നടപടിയാണ് ഇതെന്നും അഭിഭാഷകര് വാദിച്ചു. നിരോധിത സംഘടനയില് അംഗത്വം, ലഘുലേഖകളുടെ വിതരണം, ആശയപ്രചാരണം തുടങ്ങിയ കാര്യങ്ങള്ക്കാണ് അലന് ഷുഹൈബ്, താഹ ഫസല് എന്നിവര്ക്കെതിരേ കോഴിക്കോട് പന്തീരാങ്കാവ് പോലീസ് കേസെടുത്തത്. പോലീസ് നടപടിയുമായി ബന്ധപ്പെട്ടു സര്ക്കാരിനെതിരേ കടുത്ത പ്രതിഷേധമാണുയര്ന്നിരിക്കുന്നത്.