കോടതി ഗേറ്റ് താഴിട്ട് പൂട്ടി അഭിഭാഷകര്: സംഘര്ഷമൊഴിയാതെ ഡല്ഹി
![](https://www.newswings.online/wp-content/uploads/2019/11/delhi-1.jpg)
ന്യൂഡല്ഹി: പോലീസുകാരുടെ 11 മണിക്കൂര് നീണ്ട പ്രതിഷേധ സമരത്തിന് പിന്നാലെ ഡല്ഹിയില് അഭിഭാഷകരും സമരവുമായി രംഗത്ത്. ബുധനാഴ്ച രാവിലെ മുതലാണ് ഡല്ഹിയിലെ വിവിധ കോടതികളില് അഭിഭാഷകര് പ്രതിഷേധവുമായി രംഗത്തെത്തിയത്. സാകേത് കോടതിയുടെ ഗേറ്റ് അഭിഭാഷകര് പൂട്ടിയിട്ടു. ഇതിനെത്തുടര്ന്ന് നാട്ടുകാരും അഭിഭാഷകരും തമ്മില് സംഘര്ഷമുണ്ടായി.
കഴിഞ്ഞ ദിവസം അഭിഭാഷകരും പോലീസും തമ്മില് സംഘര്ഷമുണ്ടായിരുന്നു. ഇതോടെ അഭിഭാഷകര്ക്കെതിരേ നടപടിയാവശ്യപ്പെട്ട് ഡല്ഹിയില് പോലീസുകാര് പണിമുടക്കിയിരുന്നു. തീസ് ഹസാരി കോടതിവളപ്പില് പോലീസുകാര്ക്കെതിരേ അഭിഭാഷകര് നടത്തിയ കടന്നാക്രമണത്തില് കുറ്റക്കാര്ക്കെതിരേ കര്ശന നടപടി ആവശ്യപ്പെട്ടാണു സര്വീസ് ചട്ടം കണക്കിലെടുക്കാതെ പോലീസുകാര് പണിമുടക്കിയത്.
സംഭവത്തില് കേന്ദ്ര ആഭ്യന്തര മന്ത്രാലയവും റിപ്പോര്ട്ട് തേടിയിട്ടുണ്ട്. സംഭവത്തില് അഭിഭാഷകരെ അറസ്റ്റ് ചെയ്യരുതെന്ന ഹൈക്കോടതി ഉത്തരവില് കൂടുതല് വ്യക്തത വരുത്തണമെന്ന് കേന്ദ്ര ആഭ്യന്തര മന്ത്രാലയം അഭ്യര്ഥിച്ചു. തീസ് ഹസാരി കോടതി വളപ്പില് പാര്ക്കിംഗിനെ ചൊല്ലിയുള്ള തര്ക്കമാണ് വലിയ സംഘട്ടനത്തില് കലാശിച്ചത്.