മാര്ക്ക് ദാനം പിന്വലിക്കല്: ആരോപണം ശരിയാണെന്ന് തെളിഞ്ഞതായി ചെന്നിത്തല
![](https://www.newswings.online/wp-content/uploads/2019/07/Ramesh_Chennithala_EPS1.jpg)
തിരുവനന്തപുരം: എം.ജി.യൂണിവേഴ്സിറ്റിയില് നടന്ന മാര്ക്ക് ദാനം പിന്വലിപ്പിക്കാന് സാധിച്ചത് പ്രതിപക്ഷത്തിന്റെ വിജയമാണെന്ന് പ്രതിപക്ഷ നേതാവ് രമേശ് ചെന്നിത്തല. മാര്ക്ക് ദാനവുമായി ബന്ധപ്പെട്ട് ഞങ്ങള് പറഞ്ഞ കാര്യങ്ങള് ശരിയാണെന്ന് സര്ക്കാരിനും സിഡന്ഡിക്കേറ്റിനും സമ്മതിക്കേണ്ടി വന്നിരിക്കുന്നു. തെറ്റാണെന്ന് സമ്മതിച്ച സ്ഥിതിക്ക് ധാര്മികത ഉയര്ത്തി മന്ത്രി കെ.ടി.ജലീല് രാജിവെക്കണമെന്നും അദ്ദേഹം പറഞ്ഞു.
വ്യവസ്ഥാപിതമായ രീതിയില് കുട്ടികള്ക്ക് വീണ്ടും പരീക്ഷ എഴുതാന് സൗകര്യമൊരുക്കുണം. തിരഞ്ഞെടുപ്പിന് വേണ്ടി ഉന്നയിച്ചതല്ല. സര്ക്കാര് കാണിച്ച വലിയൊരു കുംഭകോണത്തെ പുറത്ത് കൊണ്ടുവരികമാത്രമാണ് ചെയ്തത്. തെറ്റ് ചൂണ്ടിക്കാണിച്ചപ്പോള് അത് തിരുത്താന് തയ്യാറായത് നല്ല കാര്യമാണ്.
മാര്ക്ക് ദാന ഉത്തരവിന്റെ അടിസ്ഥാനത്തില് 119 വിദ്യാര്ഥികള് ബിടെക് പാസാകുകയും 69 വിദ്യാര്ഥികളുടെ അപേക്ഷകള് തീര്പ്പു കല്പ്പിക്കാനുള്ള നടപടികളിലുമായിരുന്നു. സിന്ഡിക്കറ്റിന്റെ പുതിയ തീരുമാനത്തോടെ വിജയിച്ച വിദ്യാര്ഥികളുടെ സര്ട്ടിഫിക്കറ്റ് തിരിച്ചുപിടിക്കും.
ഉന്നത വിദ്യാഭ്യാസവകുപ്പ് പ്രിന്സിപ്പല് സെക്രട്ടറിയുടെ കത്ത് പ്രകാരം കഴിഞ്ഞ ഫെബ്രുവരി 22-നാണ് അദാലത്ത് നടത്തിയത്. സിന്ഡിക്കറ്റ് തീരുമാനപ്രകാരമാണു ബിടെക് പരീക്ഷയ്ക്ക് അധികമാര്ക്ക് നല്കാന് തീരുമാനിച്ചത്. മാര്ക്ക് ദാനം വിവാദമായതോടെ ചാന്സലര്കൂടിയായ ഗവര്ണര് പ്രശ്നത്തില് ഇടപെട്ടിരുന്നു.
അതേ സമയം മന്ത്രിയുടെ ഇടപെടുലമായി ബന്ധപ്പെട്ട ആരോപണങ്ങള് നിലനില്ക്കുകയാണ്. അക്കാര്യത്തില് അദ്ദേഹം അന്വേഷണം നേരിടണം.ഉപതിരഞ്ഞെടുപ്പിലെ പരാജയം സംബന്ധിച്ച് യുഡിഎഫ് യോഗം ചേര്ന്നതിന് ശേഷമേ പ്രതികരിക്കൂവെന്നും അദ്ദേഹം പറഞ്ഞു.