കാലവര്‍ഷം അകന്നു നില്‍ക്കുന്നു; രണ്ട് ദിവസം കൂടി വൈകും
തിരുവനന്തപുരം: കാലവര്‍ഷം വൈകുമെന്ന് പുതിയ പ്രവചനവുമായി കാലാവസ്ഥാ നിരീക്ഷണകേന്ദ്രം. ജൂണ്‍ എട്ടിനാകും കാലവര്‍ഷം തുടങ്ങുകയ എന്നാണ് പ്രവചനം. നേരത്തെ ജൂണ്‍ ആറിനായിരുന്നു മണ്‍സൂണ്‍ പ്രതീക്ഷിച്ചിരുന്നത്.
കാലവര്‍ഷം വൈകുമെന്ന് തന്നെയാണ് സ്വകാര്യ കാലാവസ്ഥ നിരീക്ഷണ സ്ഥാപനം സ്കൈമെറ്റ് പ്രവചിച്ചിരുന്നത്. ജൂണ്‍ ഏഴ് ആയിരുന്നു അവരുടെ പ്രവചനം. രണ്ട് ദിവസംവരെ ഈ തീയതിയില്‍ മാറ്റമുണ്ടായേക്കാം എന്നും സ്കൈമെറ്റ് പറഞ്ഞിരുന്നു.
കാലവര്‍ഷം ശ്രീലങ്കയുടെ തെക്കന്‍ ഭാഗത്തെത്തിയിട്ടുണ്ട്. അറബിക്കടലിന്‍റെ പടിഞ്ഞാറു ഭാഗത്തുണ്ടായ ന്യൂനമര്‍ദ്ദം കാറ്റിനെ തടയുകയാണ്. ലക്ഷ്വീപ് ഭാഗത്ത് ആകാശച്ചുഴി രൂപം കൊള്ളുകയും ഇത് മഴയെ കേരളത്തില്‍ എത്തിക്കുമെന്നുമാണ് പ്രതീക്ഷിക്കുന്നത്.
മെയ് 18ന് ആന്‍ഡമാന്‍ നിക്കോബാര്‍ മേഖലയില്‍ മണ്‍സൂണ്‍ വരവ് അറിയിച്ചിരുന്നു. രണ്ട് ദിവസം നേരത്തെയാണ് കാറ്റ് എത്തിയത്. എന്നിട്ടും മുന്നോട്ടുള്ള ഗതിക്ക് തടസ്സമുണ്ടായി. സൊമാലിയ തീരത്തെ ന്യൂനമര്‍ദ്ദമാണ് കാറ്റിനെ തടഞ്ഞത്.
