കാസര്കോട്, കണ്ണൂര് ലോക്സഭാ മണ്ഡലങ്ങളിലെ നാല് ബൂത്തുകളില് റീപോളിങ് നടത്താന് തിരഞ്ഞെടുപ്പ് കമ്മീഷന്റെ തീരുമാനം.
കണ്ണൂര് : കള്ളവോട്ട് നടന്നെന്ന് കണ്ടെത്തിയ കേരളത്തിലെ നാല് ബൂത്തുകളില് റീപോളിങ് നടത്താന് കേന്ദ്ര തെരഞ്ഞെടുപ്പ് കമീഷന് ഉത്തരവിട്ടു. ഞായറാഴ്ച രാവിലെ ഏഴ് മുതല് വൈകീട്ട് ആറ് മണിവരെയാണ് റീപോളിങ്. കാസര്കോട് ലോക്സഭാ മണ്ഡലത്തിലെ കല്യാശ്ശേരി, തൃക്കരിപ്പൂര് എന്നീ നിയോജക മണ്ഡലങ്ങളിലെ മൂന്നു ബൂത്തുകളിലും കണ്ണൂരിലെ ഒരു ബൂത്തിലുമാണ് റീപോളിങ് നടക്കുക. കാസർകോട് കല്യാശേരിയിലെ ബൂത്ത് നമ്പർ 19 പിലാത്തറ യു.പി സ്കൂൾ, ബൂത്ത് നമ്പർ 69 പുതിയങ്ങാടി ജമാഅത്ത് എച്ച്. എസ് നോർത്ത് ബ്ളോക്ക്, ബൂത്ത് നമ്പർ 70 ജമാഅത്ത് എച്ച്.എസ് സൗത്ത് ബ്ളോക്ക് എന്നിവിടങ്ങളിലും കണ്ണൂർ തളിപ്പറമ്പ് ബൂത്ത് നമ്പർ 166 പാമ്പുരുത്തി മാപ്പിള എ.യു.പി സ്കൂൾ എന്നിവടങ്ങളിലുമാണ് റീപോളിങ് നടത്തുന്നത്. നാല് ബൂത്തുകളിലും ഏപ്രിൽ 23ന് നടന്ന വോട്ടെടുപ്പ് തെരഞ്ഞെടുപ്പ് കമീഷൻ റദ്ദാക്കി. റിട്ടേണിംഗ് ഓഫീസർമാരുടെ റിപ്പോർട്ടുകളും ചീഫ് ഇലക്ട്രൽ ഓഫീസറുടെയും ജനറൽ ഒബ്സർവറുടെയും റിപ്പോർട്ടുകളും മറ്റു തെളിവുകളും വിശകലനം ചെയ്താണ് തെരഞ്ഞെടുപ്പ് കമീഷൻ തീരുമാനമെടുത്തത്. ജനപ്രാതിനിധ്യ നിയമം 1951ലെ സെക്ഷൻ 58 ഉപയോഗിച്ചാണ് കമീഷന്റെ നടപടി. മുഖ്യതെരഞ്ഞെടുപ്പ് ഓഫീസര് ടീക്കാറാം മീണ ഇതുസംബന്ധിച്ച നിര്ദേശം ജില്ലാ കളക്ടര്മാര്ക്ക് നല്കിയിട്ടുണ്ട്. വൈകീട്ടോടെ വിജ്ഞാപനം പുറത്തിറക്കും. നാളെ വൈകീട്ട് വരെ പരസ്യ പ്രചാരണത്തിന് അനുമതി നല്കിയിട്ടുണ്ട്. കണ്ണൂര് ജില്ലയിലെ പിലാത്തറ യു.പി സ്കൂളിലെ ബൂത്തില് നടന്ന കള്ളവോട്ടിന്റെ ദൃശ്യങ്ങള് പുറത്തുവിട്ട് കൊണ്ട് കോണ്ഗ്രസാണ് കള്ളവോട്ട് വിവാദത്തിന് തുടക്കമിടുന്നത്. പിന്നീട് ഇടതുപക്ഷവും കള്ളവോട്ട് ആരോപണവുമായി മുന്നോട്ട് വരുകയായിരുന്നു. ഇതുവരെ 17 പേര് കള്ളവോട്ട് ചെയ്തതായി സ്ഥിരീകരിച്ചിട്ടുണ്ട്.