ഡൽഹി: ലോക്സഭാ തെരഞ്ഞെടുപ്പിലെ തിളക്കമാര്‍ന്ന വിജയത്തിൽ പ്രധാനമന്ത്രി നരേന്ദ്രമോദിയെ അഭിനന്ദിച്ച് ഇന്ത്യൻ ക്രിക്കറ്റ് ക്യാപ്റ്റൻ വിരാട് കോഹ്ലി. തൻ്റെ ട്വിറ്ററിലൂടെയാണ് മോദിയെ അഭിനന്ദിച്ച് കോഹ്ലി രംഗത്തെത്തിയത്. ലോകകപ്പിനായി കോഹ്ലി നിലവിൽ ഇംഗ്ലണ്ടിലാണ്.

‘അഭിനന്ദനങ്ങള്‍ മോദിജീ. നിങ്ങളുടെ കാഴ്ചപ്പാടോടെ ഇന്ത്യ കൂടുതൽ ഉയരങ്ങളിലേക്ക് എത്താൻ പോകുകയാണെന്ന് ഞങ്ങൾ വിശ്വസിക്കുന്നു’ കോഹ്ലി ട്വിറ്ററിലൂടെ കുറിച്ചു.

വനിതാ ക്രിക്കറ്റ് താരം മിഥാലി രാജ്, ക്രിക്കറ്റ് ഇതിഹാസം സച്ചിൻ ടെൻഡൂൽക്കര്‍, ബോക്സിങ് താരം മേരി കോം, മുൻ ക്രിക്കറ്റ് താരം വിരേന്ദര്‍ സേവാഗ്, തുടങ്ങിയ പ്രമുഖതാരങ്ങളും മോദിയെ അഭിനന്ദിച്ച് രംഗത്തെത്തിയിട്ടുണ്ട്.

2019 ൽ വൻ ഭൂരപക്ഷത്തോടെയാണ് എൻഡിഎ സഖ്യം അധികാരത്തിലേറുന്നത്. തെരഞ്ഞെടുപ്പ് നടന്ന 542 സീറ്റുകളിൽ 352 സീറ്റും എൻഡിഎ പിടിച്ചെടുത്തു. ബിജെപിക്ക് മാത്രം 303 സീറ്റുകള്‍ ലഭിച്ചു. മെയ് 30 നാണ് മോദി സത്യപ്രതിഞ്ജ ചെയ്ത് അധികാരത്തിലേറുന്നത്.