എൻഎസ്എസിനെതിരെ രൂക്ഷ വിമർശനങ്ങൾ ഉന്നയിച്ച സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന് അതേനാണയത്തിൽ മറുപടിയുമായി എൻഎസ്എസ് ജനറൽ സെക്രട്ടറി ജി.സുകുമാരൻ നായർ. കോടിയേരി വല്ലാതെ അതിരുകടക്കുന്നുവെന്ന് അദ്ദേഹം കുറ്റപ്പെടുത്തി. അധികാരം കൈയിലുണ്ടെന്നു കരുതി എന്തും പറയാമെന്ന് കോടിയേരി ധരിക്കരുതെന്നും സുകുമാരൻ നായർ ഓർമിപ്പിച്ചു.

കോടിയേരി പറഞ്ഞതിനൊക്കെ തക്കതായ മറുപടിയുണ്ട്. എന്നാൽ അത് പറയാൻ തങ്ങളുടെ സംസ്കാരം അനുവദിക്കുന്നില്ല- ജനറൽ സെക്രട്ടറി തുറന്നടിച്ചു. വിശ്വാസ സംരക്ഷണത്തിലെ വൈരുധ്യമാണ് എൻഎസ്എസും സിപിഎമ്മും തമ്മിലുള്ള അകൽച്ചയ്ക്ക് കാരണം. എൻഎസ്എസിൽ ചേരിതിരിവുണ്ടാക്കാൻ ശ്രമിച്ചാൽ അതിനെ ശക്തമായി നേരിടുമെന്നും സുകുമാരൻ നായർ കൂട്ടിച്ചേർത്തു.

കേരള സംരക്ഷണ യാത്രയ്ക്കിലെ മാധ്യമങ്ങളോട് സംസാരിക്കവേയാണ് എൻഎസ്എസിനെതിരെ അതിരൂക്ഷ വിമർശനവുമായി കോടിയേരി രംഗത്തെത്തിയത്. മാടമ്പിത്തരം എൻഎസ്എസ് മനസിൽ വച്ചാൽ മതിയെന്നും മാടമ്പികളുടെ പിന്നാലെ പോകേണ്ട അവസ്ഥ സിപിഎമ്മിനില്ലെന്നുമായിരുന്നു കോടിയേരിയുടെ വാക്കുകൾ.തമ്പ്രാക്കളുടെ നിലപാടാണ് എൻഎസ്എസിനെന്നും കോടിയേരി തുറന്നടിച്ചിരുന്നു.

ജാതിയും മതവും പറഞ്ഞ് വോട്ട് പിടിക്കേണ്ട ഗതികേട് സിപിഎമ്മിനില്ലെന്നും ശബരിമലയിലെ എൻഎസ്എസ് നിലപാട് തെരഞ്ഞെടുപ്പിൽ പ്രതികൂലമാവില്ലെന്നും സിപിഎം സെക്രട്ടറി വ്യക്തമാക്കിയിരുന്നു. എൻഎസ്എസിലെ സാധാരണക്കാർ സിപിഎമ്മിന് ഒപ്പമാണെന്ന് ഓർക്കണമെന്നും കോടിയേരി പറഞ്ഞിരുന്നു. ഇതിന് മറുപടിയെന്നോണമാണ് എൻഎസ്എസിൽ ചേരിതിരിവുണ്ടാക്കാൻ ശ്രമിക്കരുത് എന്ന് സുകുമാരൻ നായർ പ്രസ്താവനയിൽ പറഞ്ഞത്.