കൊല്ലം ബൈപ്പാസ്സ് ഉത്ഘാടനം ; ‘പ്രധാനമന്ത്രിയുടെ ആഗ്രഹമല്ലേ നടക്കട്ടെ’ – മന്ത്രി സുധാകരൻ
കൊല്ലം ബൈപ്പാസ് ഉദ്ഘാടനം ചെയ്യാൻ ആഗ്രഹമുണ്ടെന്ന് പ്രധാനമന്ത്രി നരേന്ദ്ര മോദി സംസ്ഥാന സർക്കാരിനെ അറിയിക്കുകയായിരുന്നുവെന്ന് പൊതുമരാമത്ത് മന്ത്രി ജി.സുധാകരൻ. പ്രധാനമന്ത്രി ഇങ്ങോട്ട് ആഗ്രഹം പ്രകടിപ്പിച്ചതിനാൽ അത് സന്തോഷത്തോടെ സർക്കാർ സ്വീകരിക്കുകയായിരുന്നുവെന്നും മന്ത്രി വ്യക്തമാക്കി.
വികസന കാര്യങ്ങളിൽ വാദപ്രതിവാദങ്ങൾ ഒഴിവാക്കണമെന്നാണ് സർക്കാർ നിലപാടെന്നു പറഞ്ഞ മന്ത്രി ബൈപ്പാസ് ഉദ്ഘാടനത്തെക്കുറിച്ച് എൻ.കെ.പ്രേമചന്ദ്രൻ എംപി നടത്തിയ പരാമർശങ്ങളെയും രൂക്ഷമായി വിമർശിച്ചു. പ്രേമചന്ദ്രൻ, വിഷയത്തിൽ മുതലെടുപ്പിന് ശ്രമിക്കുകയാണെന്നും അദ്ദേഹം കുറ്റപ്പെടുത്തി.
ബൈപ്പാസ് പ്രധാനമന്ത്രി തന്നെ ഉദ്ഘാടനം ചെയ്യുമെന്നും അതിന്റെ തീയതി ഈ മാസം 15 ആണെന്നും പ്രേമചന്ദ്രൻ ചൊവ്വാഴ്ച നടത്തിയ വാർത്താ സമ്മേളനത്തിൽ വ്യക്തമാക്കിയിരുന്നു. ഇതാണ് മന്ത്രിയെ ചൊടിപ്പിച്ചത്.
നേരത്തെ, ബൈപ്പാസ് ഉദ്ഘാടനത്തിന് പ്രധാനമന്ത്രി വരുന്നതിനേക്കുറിച്ച് ചോദിച്ചപ്പോൾ മുഖ്യമന്ത്രി അതിന് കൃത്യമായ ഉത്തരം നൽകിയിരുന്നില്ല. മറ്റ് മന്ത്രിമാരും ഇക്കാര്യത്തിൽ ആധികാരികമായി പ്രതികരണം നടത്തിയിരുന്നില്ല.