കണ്ണൂർ ഇരിട്ടി പട്ടാരം ദേവമാതാ സെമിനാരിയുടെ മുൻ ഡയറക്ടർ ഉളിക്കൽ കാലാങ്കി സ്വദേശി ഫാ.ജയിംസ് വർഗ്ഗീസ് തെക്കേമുറിയിലാണ് (43) എക്സൈസിന്‍റെ പിടിയിലായത്. കര്‍ഷകന്‍റെ സ്കൂട്ടറില് കഞ്ചാവ് വച്ച് എക്സൈസിനെക്കൊണ്ട് പിടിപ്പിക്കാനാണ് വൈദികന്‍ ശ്രമിച്ചത്.
ഫാ.ജയിംസിനെതിരെ കർഷകന്‍റെ വൈദിക വിദ്യാർഥിയായ മകൻ പ്രകൃതിവിരുദ്ധ പീഡന പരാതി നൽകിയതാണ് പ്രകോപനത്തിനു കാരണം. ഫാ.ജയിംസിന്‍റെ സഹോദരൻ സണ്ണി വർഗീസ്, ബന്ധു ടി.എൽ.റോയി എന്നിവരെ കേസിൽ നേരത്തെ അറസ്റ്റ് ചെയ്തിരുന്നു. 2017 മെയ് 29 നായിരുന്നു കേസിനാസ്പദമായ സംഭവം. ചാപ്പക്കടവിലെ തോട്ടത്തില്‍ ജോസഫ് എന്നയാളുടെ സ്കൂട്ടറില് കഞ്ചാവ് സൂക്ഷിച്ചിട്ടുണ്ടെന്ന് തെറ്റായ വിവരം നല്‍കി എക്‌സൈസ് സംഘത്തെക്കൊണ്ട് റെയിഡ് നടത്തിക്കാന്‍ ശ്രമിച്ചുവെന്നാണ് കേസ്. കേസില്‍ മൂന്നാം പ്രതിയായ വൈദികനെയാണ് ഇന്നലെ വൈകുന്നേരം തളിപ്പറമ്പ് എക്‌സൈസ് സര്‍ക്കിള്‍ ഇന്‍സ്‌പെക്ടര്‍ എസ്.കൃഷ്ണകുമാറും സംഘവും ചേര്‍ന്ന് അറസ്റ്റ് ചെയ്തത്.
ഇരിട്ടി പട്ടാരം ദൈവമാതാ സെമിനാരിയിലെ വിദ്യാര്‍ത്ഥിയായിരുന്ന ജോസഫിന്റെ മകനെ പീഡിപ്പിച്ച വിരോധത്തിനാണ് ജോസഫിനെ കഞ്ചാവ് സ്കൂട്ടറില് വെച്ച് കേസില്‍ കുടുക്കാന്‍ ശ്രമിച്ചത്. പരിശോധനക്കെത്തിയ എക്‌സൈസ് സംഘത്തിന് വിവരം നല്‍കിയത് വൈദികന്റെ സഹോദരന്‍ സണ്ണി വര്‍ഗീസ് ആയിരുന്നു. എന്തായാലും പരിശോധിക്കണമെന്നുംസ്‌കൂട്ടറിന്റെ സീറ്റില്‍ ലോക്കില്ലെന്ന് സ്ഥലത്തുണ്ടായിരുന്ന സണ്ണിവര്‍ഗീസ് പറഞ്ഞതോടെ സംശയം തോന്നിയ എക്‌സൈസ് സംഘംപരിശോധന നടത്താതെ തിരിച്ചുപോയി. കോള്‍ലിസ്റ്റ് പരിശോധിച്ചപ്പോഴാണ് വിളിച്ചനമ്പര്‍ ഒരു കന്യാസ്ത്രീയുടെ പേരിലാണെന്ന് മനസിലായത്. അവരെ ചോദ്യം ചെയ്തപ്പോള്‍ സഹോദരനായ തെക്കേമുറിയില്‍ ടി.എല്‍.റോയിക്ക് സിം നല്‍കിയിരുന്നു എന്ന വിവരം ലഭിച്ചത്. റോയിയെ വിളിച്ച് അന്വേഷിച്ചപ്പോഴാണ് സിം സണ്ണി വര്‍ഗീസിന് നല്‍കിയതായി സമ്മതിച്ചത്. തുടര്‍ന്ന് നടത്തിയ അന്വേഷണത്തില്‍ ജോസഫിനെ കേസില്‍ കുടുക്കാന്‍ വൈദികനുള്‍പ്പെടെനടത്തിയ ഗൂഡാലോചനയാണ് ഇതെന്ന് വ്യക്തമായത്. അറസ്റ്റ് ചെയ്ത വൈദികനെ തളിപ്പറമ്പ് താലൂക്ക് ആശുപത്രിയില്‍ വൈദ്യപരിശോധനക്ക് വിധേയനാക്കിയ ശേഷം തളിപ്പറമ്പ് മജിസ്‌ട്രേറ്റിന് മുന്നില്‍ ഹാജരാക്കി റിമാന്‍ഡ് ചെയ്തു.
