നിര്‍ബന്ധിത ശമ്പള പിരിവ് കൊള്ളയെന്ന് ഹൈക്കോടതി
പ്രളയക്കെടുതിയെ നേരിടാന്‍ ദേവസ്വം ബോര്‍ഡിലെ ജീവനക്കാരില്‍ നിന്ന് നിര്‍ബന്ധിത പിരിവ് നടത്തുന്നത് കൊള്ളയെന്ന് ഹൈക്കോടതി പറഞ്ഞു. സഹകരിക്കണമെന്നാണ് മുഖ്യമന്ത്രി ആവശ്യപ്പെട്ടതെന്ന് ഹൈക്കോടതി ചൂണ്ടിക്കാണിച്ചു. അല്ലാതെ നിര്‍ബന്ധിത പിരിവിന് നിര്‍ദേശമില്ലെന്നും ഹൈക്കോടതി വ്യക്തമാക്കി.
ദുരിതബാധിതര്‍ക്കായി സര്‍ക്കാര്‍ ജീവനക്കാര്‍ ഒരു മാസത്തെ ശമ്പളം നല്‍കി സഹായിക്കണമെന്ന മുഖ്യമന്ത്രിയുടെ ആഹ്വാനത്തിന് പിന്നാലെയാണ് ദേവസ്വം ബോര്‍ഡ് നിര്‍ദ്ദേശം പുറപ്പെടുവിച്ചത്. എന്നാല്‍, മുഖ്യമന്ത്രി ജീവനക്കാരില്‍ നിന്ന് നിര്‍ബന്ധിത പണപ്പിരിവ് നടത്താന്‍ ആഹ്വാനം ചെയ്തിട്ടില്ല. സ്വമേധയ അല്ലാതെ ജീവനക്കാരില്‍ നിന്നും നിര്‍ബന്ധിച്ച് പണം വാങ്ങുന്നത് കൊള്ളയായി കണക്കാക്കണമെന്നാണ് കോടതി പരാമര്‍ശിച്ചത്.
കോടതി നിര്‍ദ്ദേശത്തിന് പിന്നാലെ തീരുമാനം പുനപരിശോധിക്കാന്‍ ദേവസ്വം ബോര്‍ഡ് തയ്യാറായി. മുന്‍പ് മലബാര്‍ ദേവസ്വം ബോര്‍ഡും ജീവനക്കാരില്‍ നിന്നും ഒരു മാസത്തെ ശമ്പളം ആവശ്യപ്പെട്ടിരുന്നു.
