പ്രളയം: സംസ്ഥാനത്തെ കോളേജുകള്‍ ശനിയാഴ്ചകളിലും പ്രവര്‍ത്തിക്കും
പ്രളയം കാരണം നഷ്ടപ്പെട്ട പ്രവര്‍ത്തി ദിനങ്ങള്‍ തിരിച്ചു പിടിക്കാന്‍ സംസ്ഥാനത്തെ കോളേജുകള്‍ ശനിയാഴ്ചകളിലും പ്രവര്‍ത്തിക്കും. കോഴ്‌സുകള്‍ സമയബന്ധിതമായി പൂര്‍ത്തിയാക്കാന്‍ ശനിയാഴ്ചകള്‍ ഉള്‍പ്പെടെയുള്ള അവധി ദിവസങ്ങളില്‍ ക്ലാസ്സ് നടത്തണമെന്ന് ഉന്നതവിദ്യാഭ്യാസ വകുപ്പ് കോളജുകള്‍ക്കും സര്‍വകലാശാലകള്‍ക്കും നിര്‍ദ്ദേശം നല്‍കി.
ഇത് സംബന്ധിച്ച് അതാത് സർവകലാശാലകൾക്കും കോളജുകൾക്കും തീരുമാനങ്ങൾ കൈക്കൊള്ളാമെന്നും നിര്‍ദ്ദേശത്തില്‍ പറയുന്നുണ്ട്. ചില സ്ഥലങ്ങളിൽ കൂടുതൽ അധ്യയനദിനങ്ങൾ നഷ്ടമായിട്ടുണ്ട്. പ്രളയം ബാധിക്കാത്ത സ്ഥലങ്ങളില്‍ അതുണ്ടായിട്ടില്ല. അതു കൊണ്ടാണ് അതാത് സർവകലാശാലകൾക്കും കോളജുകൾക്കും തീരുമാനങ്ങൾ കൈക്കൊള്ളാനുള്ള അധികാരം നല്‍കിയിരിക്കുന്നതെന്ന് ഉന്നത വിദ്യാഭ്യാസമന്ത്രിയുടെ ഓഫീസ് അറിയിച്ചു.
