ഇന്ധന വിലവര്‍ധന : ചരക്ക് ലോറി ഉടമകളുടെ സംഘട അനിശ്ചിതകാല സമരത്തിലേക്ക്
പെട്രോള്‍ ഡീസല്‍ വില രാജ്യത്ത് സര്‍വ്വകാല റെക്കോര്‍ഡിലെത്തിയ പശ്ചാത്തലത്തിലാണ് ചരക്ക് നീക്കം സ്തംഭിപ്പിക്കുമെന്ന് ലോറി ഉടമകളുടെ സംഘടന മുന്നറിയിപ്പ് നല്‍കിയിരിക്കുന്നത്. അടിക്കടി കുതിച്ച് ഉയരുന്ന ഇന്ധനവിലയില്‍ ചരക്ക് നീക്കം വന്‍ നഷ്ടമായെന്ന് ചൂണ്ടികാട്ടിയാണ് അനിശ്ചിതകാല സമരം.ജൂലൈ ഇരുപത് മുതല്‍ അനിശ്ചിതകാല സമരം നടത്താനാണ് ചരക്ക് ലോറി ഉടമകളുടെ സംഘടനയുടെ തീരുമാനം. എക്സൈസ് നികുതി കുറയ്ക്കും വരെ രാജ്യവ്യാപക സമരം തുടരുമെന്നും സംഘടന വ്യക്തമാക്കി. പെട്രോളും ഡീസലും ജിഎസ്ടിയുടെ പരിധിയില്‍ കൊണ്ടുവരുക, എക്സൈസ് നികുതി കുറയ്ക്കുക, നാല് മാസം കൂടുമ്പോള്‍ മാത്രം വില പുതുക്കുക എന്നിവയാണ് പ്രധാന ആവശ്യങ്ങള്‍.
അതേസമയം ഇന്ധനവില വര്‍ധനവില്‍ കേന്ദ്രസര്‍ക്കാരിന് എതിരെ രൂക്ഷ വിമര്‍ശനവുമായി പ്രതിപക്ഷ പാര്‍ട്ടികള്‍ രംഗത്തെത്തി. ഒപെക് രാജ്യങ്ങളിലെ ഇന്ധന വില വര്‍ധനവാണ് വില കുതിച്ച് ഉയരാന്‍ കാരണമെന്ന് സര്‍ക്കാര്‍ വിശദീകരിക്കുന്നു. ഇന്ധനവില വര്‍ധവിനെ കുറിച്ചുള്ള മാധ്യമപ്രവര്‍ത്തകരുടെ ചോദ്യത്തോട് ബിജെപി അധ്യക്ഷന്‍ അമിത്ഷാ പ്രതികരിച്ചില്ല. എണ്ണവിലവർദ്ധനവിൻറെ പൂർണ്ണ ഉത്തരവാദിത്വം കേന്ദ്രസർക്കാരിനാണെന്ന് പ്രതിപക്ഷം കുറ്റപ്പെടുത്തി.
