അപ്രഖ്യാപിത ഹര്ത്താലിന്റെ ഉറവിടം കണ്ടെത്തിയതായി പോലീസ്
കത്വ സംഭവത്തില് പ്രതിഷേധിച്ച് സംസ്ഥാനത്ത് അപ്രഖ്യാപിത ഹര്ത്താലിന് ആഹ്വാനം ചെയ്തതിന്റെ ഉറവിടം പോലീസ് കണ്ടെത്തി. വോയ്സ് ഓഫ് യൂത്ത് എന്ന വാട്സ്ആപ്പ് ഗ്രൂപ്പുകള് വഴിയാണ് മലപ്പുറത്ത് സന്ദേശങ്ങള് പ്രചരിപ്പിച്ചത്.
ഹര്ത്താലിനും കലാപത്തിനും ആഹ്വാനം ചെയ്ത വാട്സ്ആപ്പ് ഗ്രൂപ്പിന്റെ അഡ്മിന് 16 വയസുകാരനാണ്. മലപ്പുറം കൂട്ടായി സ്വദേശിയായ പത്താം ക്ലാസുകാരനാണ് ഇയാള്. പ്രായപൂര്ത്തി ആകാത്തതിനാല് ഇയാളെ കസ്റ്റഡിയിലെടുത്തിട്ടില്ല. മൊബൈല് ഫോണ് പിടിച്ചെടുത്തിട്ടുണ്ട്. മറ്റു ചില വാട്സ്ആപ്പ് ഗ്രൂപ്പ് അഡ്മിന്മാരും പോലീസിന്റെ നിരീക്ഷണത്തിലാണ്.
ഹര്ത്താലില് മലപ്പുറം ജില്ലയില് മാത്രം അഞ്ഞൂറോളം പേര് ഇതിനകം അറസ്റ്റിലായിട്ടുണ്ട്. കോഴിക്കോടും അറസ്റ്റിലായവരുടെ ഫോണ് പിടിച്ചെടുത്ത് വാട്സ് ആപ്പ് ഗ്രൂപ്പ് അഡ്മിന്മാരെ വിളിച്ച് വരുത്തി അന്വേഷണം തുടങ്ങയിട്ടുണ്ട്.
സംസ്ഥാനത്താകെ സംഘര്ഷാവസ്ഥ സൃഷ്ടിക്കും വിധം ഹര്ത്താലിന് ആഹ്വാനം നല്കിയ സന്ദേശം തയാറാക്കിയവരെ പൊലീസ് ചോദ്യം ചെയ്തു വരികയാണ്. തിരുവനന്തപുരം, കിളിമാനൂര് സ്വദേശികളായ അഞ്ചു പേരാണ് മഞ്ചേരി പൊലീസിന്റെ കസ്റ്റഡിയിലുളളത്. ഹര്ത്താലിന് ആഹ്വാനം നല്കിയ ആദ്യ വാട്സാപ് സന്ദേശം കിളിമാനൂര് സ്വദേശിയാണ് പോസ്റ്റു ചെയ്തതെന്ന സംശയത്തിലാണ് ചോദ്യം ചെയ്യല്.