ബാറിൽ സംഘർഷം; മാനേജർക്ക് വെടിയേറ്റു
ആലത്തൂർ കാവശേരിയിൽ ബാറിലുണ്ടായ വെടിവയ്പ്പിൽ മാനേജർക്ക് പരിക്കേറ്റു. ഞായറാഴ്ച രാത്രിയാണ് സംഭവം. ആറുമാസം മുമ്പാണ് ഈ ബാർ പ്രവർത്തനമാരംഭിച്ചത്. മദ്യപിക്കാനെത്തിയ സംഘം ബാറിലെ സർവീസ് മോശമാണെന്ന് ആരോപിച്ച് മാനേജർ രഘുനന്ദനുമായി വാക്കുതർക്കത്തിലേർപ്പെട്ടു. ഇത് സംഘർഷത്തിലേക്ക് നയിക്കുകയായിരുന്നു. പിന്നാലെ പ്രകോപനം കൂടാതെ സംഘം എയർ പിസ്റ്റൽ ഉപയോഗിച്ച് രഘുനന്ദനെ വെടിവയ്ക്കുകയായിരുന്നുവെന്ന് പോലീസ് പറഞ്ഞു.
സംഭവത്തിൽ അഞ്ചുപേർ ആലത്തൂർ പോലീസിന്റെ കസ്റ്റഡിയിലായിട്ടുണ്ട്. ഇവരിൽ നാലുപേർ കഞ്ചിക്കോട് സ്വദേശികളാണ്. ഇവരെ ചോദ്യംചെയ്തുവരികയാണ്. അതേസമയം നട്ടെല്ലിന് വെടിയേറ്റ രഘുനന്ദന്റെ ആരോഗ്യനില തൃപ്തികരമാണെന്ന് ആശുപത്രി അധികൃതർ അറിയിച്ചു.