ഇന്ത്യൻ അധീനമേഖല ചേർത്തുള്ള വിവാദഭൂപടം നേപ്പാള്‍ പാർലമെന്‍റ് പാസ്സാക്കി
കാഠ്മണ്ഡു: ഇന്ത്യയുടെ പ്രദേശങ്ങളെ ഉള്‍പ്പെടുത്തിയ പുതിയ ഭൂപടം നേപ്പാള്‍ പാര്‍ലമെന്‍റ് അംഗീകരിച്ചു. ഉപരിസഭയും അധോസഭയും ഐകകണ്ഠ്യേന പാസാക്കിയ നിര്‍ദേശം പാര്‍ലമെന്‍റില്‍ ഭരണഘടനാ ഭേദഗതിയായിട്ടാണ് അംഗീകരിക്കപ്പെട്ടത്.
ഉത്തരാഖണ്ഡിന്‍റെ ഭാഗങ്ങളായ കാലാപാനി, ലിപുലേഖ്, ലിപിയദുരെ പ്രദേശങ്ങള്‍ നേപ്പാള്‍ പുതിയ ഭൂപടത്തില്‍ ഉള്‍പ്പെടുത്തി. ഇന്ത്യന്‍ പ്രദേശങ്ങള്‍ ഉള്‍പ്പെടുത്തി ഭൂപടം പരിഷ്ക്കരിക്കാനുള്ള ഭരണഘടന ഭേദഗതി ബില്‍ നേപ്പാള്‍ പാര്‍ലമെന്‍റിന്‍റെ ഉപരിസഭയില്‍ അവതരിപ്പിക്കുകയായിരുന്നു. പ്രസിഡന്‍റ് അംഗീകരിക്കുക കൂടി ചെയ്താല്‍ ഭൂപട പരിഷ്കരണത്തിന് നിയമപ്രാബല്യം ലഭിക്കും.
57 പേരുടെ ഭൂരിപക്ഷ തീരുമാനം അനുസരിച്ചാണ് സഭ അംഗീകരിച്ചത്. നേപ്പാളിന്‍റെ രാഷ്ട്രീയവും ഭരണപരവുമായ ഒൗദ്യോഗിക ഭൂപടമായി ഇന്നുമുതല്‍ പുതിയ ഭൂപടം നിലവില്‍ വന്നതായി നേപ്പാള്‍ പ്രധാനമന്ത്രി കെ.പി. ശര്‍മ ഒലി പ്രസ്താവനയില്‍ പറഞ്ഞു.
