സംസ്ഥാനത്തെ അടച്ചിട്ട ബാർബർ ഷോപ്പുകളും ബ്യൂട്ടി പാർലറുകളും ബുധനാഴ്ച മുതൽ തുറക്കും
തിരുവനന്തപുരം: സംസ്ഥാനത്ത് കോവിഡ് ഭീഷണിയെ തുടർന്ന് അടച്ചിട്ട ബാർബർ ഷോപ്പുകളും ബ്യൂട്ടി പാർലറുകളും തുറക്കുന്നു. ബുധനാഴ്ച മുതൽ ബാർബർ ഷോപ്പുകൾക്കും ബ്യൂട്ടി പാർലറുകൾക്കും തുറന്ന് പ്രവർത്തിക്കാമെന്ന് മുഖ്യമന്ത്രി പിണറായി വിജയൻ അറിയിച്ചു.
എന്നാൽ കൃത്യമായ മാർഗനിർദേശങ്ങളുടെ അടിസ്ഥാനത്തിലായിരിക്കണം ഇവയുടെ പ്രവർത്തനമെന്നും മുഖ്യമന്ത്രി പറഞ്ഞു. കടകളിൽ ഹെയർ കട്ടിംഗ്, ഡ്രസിംഗ്, ഷേവിംഗ് എന്നീ പ്രവർത്തനങ്ങൾക്ക് മാത്രമാണ് അനുമതി.
എസി പ്രവർത്തിപ്പിക്കാൻ പാടില്ല. മുടിവെട്ടാൻ ഓരോരുത്തർക്കും പ്രത്യേകം ടൗവൽ ഉപയോഗിക്കണം. പറ്റുമെങ്കിൽ മുടിവെട്ടാൻ എത്തുന്ന ആൾ തന്നെ ടൗവൽ കരുതണം. കടയിൽ രണ്ട് പേരിൽ കൂടുതൽ കൂടി നിൽക്കാൻ പാടില്ല. സാനിറ്റൈസർ നിർബന്ധമായും കടയിൽ ഉണ്ടാവുകയും വേണം.
ഊഴം അനുസരിച്ച് മുടിവെട്ടുന്നതിന് മൊബൈൽ ഫോണിലൂടെ നിർദേശങ്ങൾ നൽകാൻ കഴിയണമെന്നും നിബന്ധനകളിൽ പറയുന്നു. കടകൾ ചൊവ്വാഴ്ച മുതൽ തുറക്കാൻ അനുമതിയുണ്ട്. എന്നാൽ ചൊവ്വാഴ്ച ദിവസം ശുചീകരണ പ്രവർത്തികൾ മാത്രമേ പാടുള്ളുവെന്ന് മുഖ്യമന്ത്രി വാർത്താ സമ്മേളനത്തിൽ പറഞ്ഞു.
