കോഴിക്കോട് മിഠായി തെരുവ് നാളെ മുതല്‍ തുറക്കും
കോഴിക്കോട്: കര്‍ശന വ്യവസ്ഥകളോടെ മിഠായി തെവുവ് നാളെ മുതല്‍ തുറക്കാന്‍ തീരുമാനം. കോഴിക്കോട് ജില്ലാ കളക്ടറുടെ അധ്യക്ഷതയില്‍ ചേര്‍ന്ന യോഗത്തിലാണ് തീരുമാനം.
ഒരു കടയില്‍ ഒരു സമയം എത്ര പേരെ കയറ്റാന്‍ കഴിയുമെന്നും കടയുടെ വലിപ്പം സംബന്ധിച്ചും കടയുടമകള്‍ സത്യവാങ് മൂലം നല്‍കണം. സാധനങ്ങള്‍ വാങ്ങിക്കാനല്ലാതെ ആരേയും മിഠായി തെരുവിലേക്ക് പ്രവേശിപ്പിക്കുകയില്ല. തെരുവു കച്ചവടം പാടില്ല. നിയലംഘനം നടന്നാല്‍ പിഴ ശിക്ഷയടക്കം ചുമത്താനും യോഗത്തില്‍ തീരുമാനമായി.
മറ്റിടങ്ങളില്‍ കടകള്‍ തുറന്നെങ്കിലും മിഠായി തെരുവില്‍ കച്ചവടം നിരോധിച്ചത് വ്യാപാരികള്‍ക്കിടയില്‍ പ്രതിഷേധത്തിനു വഴിതെളിച്ചിരുന്നു. കോവിഡിനെ തുടര്‍ന്ന് പ്രതിസന്ധിയിലായ കച്ചവടക്കാര്‍ക്ക് പെരുന്നാള്‍ കാലത്തും കടകള്‍ തുറക്കാന്‍ കഴിഞ്ഞില്ലെങ്കില്‍ വലിയ തിരിച്ചടിയാകുമെന്ന് വ്യാപാരികള്‍ പരാതിപ്പെട്ടിരുന്നു. ഇതേ തുടര്‍ന്നാണ് കളക്ടര്‍ യോഗം വിളിച്ചതും കടകള്‍ തുറക്കാന്‍ തീരുമാനമായതും.
അതേസമയം, ലോക്ക്ഡൗണ്‍ ലംഘിച്ച്‌ മിഠായി തെരുവില്‍ കട തുറന്ന വ്യാപാരി വ്യവസായി ഏകോപന സമിതി പ്രസിഡന്‍റ് ടി. നാസറുദ്ദീനെതിരെ പോലീസ് കഴിഞ്ഞ ദിവസം കേസെടുത്തിരുന്നു. ചെറിയ തുണിക്കടകള്‍ തുറക്കാന്‍ മഖ്യമന്ത്രി അനുമതി നല്‍കിയിട്ടുണ്ട് എന്ന് അവകാശപ്പെട്ടാണ് അദ്ദേഹം എത്തിയത്. പോലീസ് കട അടപ്പിച്ചിരുന്നു.
