അന്യസംസ്ഥാനങ്ങളിൽ കുടുങ്ങിപ്പോയ വിദ്യാർഥികളെ നാട്ടിലെത്തിക്കാൻ പ്രത്യേക ട്രെയിൻ വേണമെന്ന് കേന്ദ്രത്തോട് ആവശ്യപ്പെട്ടതായി മുഖ്യമന്ത്രി
തിരുവനന്തപുരം: അന്യസംസ്ഥാനങ്ങളിൽ കുടുങ്ങിപ്പോയ വിദ്യാർഥികളെ നാട്ടിലെത്തിക്കാൻ പ്രത്യേക ട്രെയിൻ വേണമെന്ന് കേന്ദ്രത്തോട് ആവശ്യപ്പെട്ടതായി മുഖ്യമന്ത്രി പിണറായി വിജയൻ. ഡൽഹിയിലും ഡൽഹിക്ക് സമീപ പ്രദേശങ്ങളിലുമുള്ള വിദ്യാർഥികളെ പ്രത്യേക നോൺ സ്റ്റോപ് ട്രയിനിൽ നാട്ടിലെത്തിക്കാനാണ് ശ്രമം- മുഖ്യമന്ത്രി അറിയിച്ചു.
ഡൽഹിക്ക് സമീപപ്രദേശങ്ങളിലുള്ള വിദ്യാർഥികളെ ഡൽഹിയിലേക്ക് എത്തിച്ച് അവിടെനിന്നും ട്രെയിൻ പുറപ്പെടാനാണ് ആലോചിക്കുന്നത്. ട്രെയിൻ അനുവദിക്കണമെന്ന് കേന്ദ്രത്തോട് ആവശ്യപ്പെടുകയും ബന്ധപ്പെട്ട മുഖ്യമന്ത്രിമാരെ വിവരം അറിയിക്കുകയും ചെയ്തതു. ട്രെയിൻ അനുവദിക്കുമെന്നാണ് പ്രതീക്ഷയെന്നും മുഖ്യമന്ത്രി പറഞ്ഞു.
ഇതുപോലെ മുംബൈ, ബംഗളൂരു എന്നീ നഗരങ്ങളിൽ കുടുങ്ങിയ കേരളീയരെ തിരിച്ചെത്തിക്കാൻ പ്രത്യേക ട്രെയിൻ ലഭ്യമാക്കുന്നതിനുള്ള നപടികളും തുടരുമെന്നും മുഖ്യമന്ത്രി അറിയിച്ചു.