കേരളം ലോക്ക്ഡൗണ് ചട്ടങ്ങള് ലംഘിച്ചിട്ടില്ലെന്ന് മന്ത്രി കടകംപള്ളി സുരേന്ദ്രന്
തിരുവനന്തപുരം: കേന്ദ്രസര്ക്കാര് പ്രഖ്യാപിച്ചിരിക്കുന്ന ലോക്ക്ഡൗണ് ചട്ടങ്ങള് കേരളം ലംഘിച്ചിട്ടില്ലെന്ന് മന്ത്രി കടകംപള്ളി സുരേന്ദ്രന്. കേന്ദ്രസര്ക്കാരിന്റെ ചട്ടങ്ങള് പാലിച്ചാണ് സംസ്ഥാനം ഇളവുകള് അനുവദിച്ചത്. കേന്ദ്രം നോട്ടീസ് അയച്ചത് തെറ്റിദ്ധാരണ കാരണമാണെന്നും മന്ത്രി പറഞ്ഞു. മറുപടി നല്കുന്നതിലൂടെ തെറ്റിദ്ധാരണ പരിഹരിക്കാനാകും. കേന്ദ്ര നിലപാടും സംസ്ഥാന സര്ക്കാര് നിലപാടും ഒരേ പാളത്തിലൂടെ സഞ്ചരിക്കുന്നവയാണ്. യാതൊരു തരത്തിലുള്ള ഭിന്നതയും ഇതിലില്ലെന്ന് മന്ത്രി വിശദീകരിച്ചു.
അതേസമയം കേരളത്തില് ഏപ്രില് 15ന് പുറപ്പെടുവിച്ച സംസ്ഥാന സര്ക്കാരിന്റെ നടപടി കേന്ദ്ര മാര്ഗനിര്ദേശങ്ങള്ക്ക് വിരുദ്ധമെന്നാണ് കേന്ദ്രസര്ക്കാരിന്റെ കണ്ടെത്തല്. തുടര്ന്ന് ഇത് സംബന്ധിച്ച് കേരളത്തോട് വിശദീകരണം ആവശ്യപ്പെട്ട് ചീഫ് സെക്രട്ടറിക്ക് കേന്ദ്ര ആഭ്യന്തരമന്ത്രാലയം നോട്ടീസ് അയക്കുകയായിരുന്നു.
കേരളത്തില് ലോക്ക് ഡൌണ് ഇളവുകളുടെ ഭാഗമായി ബാര്ബര്ഷോപ്പുകളും ഹോട്ടലുകളും തുറക്കാന് സംസ്ഥാന സര്ക്കാര് അനുമതി പ്രഖ്യാപിച്ചിരുന്നു. എന്നാല് ഇത് ലോക്ക്ഡൗണ് ചട്ടലംഘനമാണെന്നാണ് കേന്ദ്രത്തിന്റെ വാദം.