പ്രണയാഭ്യര്‍ത്ഥന നിരസിച്ചു: എസ്.ഐയെ കൊലപ്പെടുത്തി സഹപ്രവര്‍ത്തകന്‍ ആത്മഹത്യ ചെയ്തു
ന്യൂഡല്‍ഹി: ഡല്‍ഹിയില്‍ എസ്.ഐയെ വെടിവെച്ചു കൊന്നു. പത്പരാഗഞ്ച് വ്യവസായ മേഖലയിലെ സബ് ഇന്‍സ്പെക്ടര്‍ പ്രീതി അഹ്ലാവത്താണ് കൊല്ലപ്പെട്ടത്. ഇന്നലെ രാത്രി 9.30ഓടെയാണ് സംഭവം. തലയ്ക്ക് വെടിയേറ്റ പ്രീതി സംഭവ സ്ഥലത്തുവെച്ചുതന്നെ മരിച്ചു.
പ്രീതിയെ കൊലപ്പെടുത്തിയെന്ന് സംശയിക്കുന്ന സഹപ്രവര്‍ത്തകന്‍ ദീപാന്‍ശു രതിയെ ഹരിയാനയിലെ സോനിപത്തില്‍ ആത്മഹത്യ ചെയ്ത നിലയില്‍ കണ്ടെത്തി.
പ്രീതിക്ക് തലക്കാണ് വെടിയേറ്റതെന്ന് പൊലീസ് പറഞ്ഞു. അക്രമിയുടേതെന്ന് സംശയിക്കുന്ന സി.സി.ടി ഫൂട്ടേജുകള്‍ ലഭിച്ചിട്ടുണ്ടെന്ന് ഡല്‍ഹി പൊലീസ് കമ്മീഷണര്‍ എസ്.ഡി മിശ്ര അറിയിച്ചു. ശൂന്യമായ മൂന്ന് കാഡ്രിജ്ജുകളും സംഭവ സ്ഥലത്ത് നിന്ന് കണ്ടെടുത്തിട്ടുണ്ട്. 2018ലാണ് ഹരിയാന സ്വദേശിയായ പ്രീതി ഡല്‍ഹി പൊലീസില്‍ ചേരുന്നത്. ഡല്‍ഹിയിലെ രോഹിണിയില്‍ വാടക വീട്ടിലാണ് അവരുടെ താമസം.
