കാക്കനാട് വിദ്യാര്ത്ഥിനിക്ക് കുത്തേറ്റ സംഭവം: ഒരാള് പിടിയില്
കൊച്ചി: കാക്കനാട് ഇന്ഫോപാര്ക്കിന് സമീപം വിദ്യാര്ത്ഥിനിക്ക് കുത്തേറ്റ സംഭവത്തില് ഒരാള് പിടിയില്. ഇയാളെ തെളിവെടുപ്പിനായി സംഭവസ്ഥലത്ത് എത്തിക്കും.
പടമുഗള് താണപാടം അമലിനെയാണു പോലീസ് കസ്റ്റഡിയിലെടുത്തത്. ഇയാളെ തെളിവെടുപ്പിനായി സംഭവസ്ഥലത്തെത്തിക്കും. അതേസമയം, പെണ്കുട്ടിയുടെ നില ഗുരുതരമായി തുടരുകയാണ്. പെണ്കുട്ടിയെ കളമശേരി മെഡിക്കല് കോളജില് അടിയന്തര ശസ്ത്രക്രിയയ്ക്കു വിധേയയാക്കി. കുത്തേറ്റ മുറിവുകള് ആഴത്തില് ഉള്ളതാണെന്ന് ഡോക്ടര്മാര് അറിയിച്ചു.
തിങ്കളാഴ്ച വൈകീട്ട് അഞ്ച് മണിക്ക് കാക്കനാട് ഇന്ഫോപാര്ക്കിന് സമീപത്തെ കുസുമഗിരി എന്ന സ്ഥലത്ത് വെച്ചാണ് ഫാര്മസി കോഴ്സ് വിദ്യാര്ത്ഥിനി നൂര്ജഹാന് കുത്തേറ്റത്. ബസ്സിറങ്ങി അടുത്തുള്ള ഡേ കെയര് സെന്ററിലേക്ക് നടക്കുമ്ബോഴായിരുന്നു വിദ്യാര്ത്ഥിനിക്ക് നേരെ ആക്രമണം ഉണ്ടായത്.
കലൂരിലുളള സ്വകാര്യ കോളജില് ഡിഫാം പഠനത്തോടൊപ്പം കഴിഞ്ഞ ജൂലൈ മുതല് കാക്കനാട്ടെ ഡേ കെയര് സ്ഥാപനത്തില് വൈകുന്നേരം പാര്ട്ട് ടൈമായി ജോലി ചെയ്തുവരികയായിരുന്നു പെണ്കുട്ടി. അമല് വെല്ഡിംഗ് ജോലിക്കാരനാണ്. ഇരുവരും തമ്മിലുള്ള പ്രണയം വീട്ടുകാര് അറിഞ്ഞതോടെ ഉണ്ടായ സംഭവവികാസങ്ങളാണ് പ്രതിയെ ഈ കടുംകൈയ്ക്കു പ്രേരിപ്പിച്ചതെന്നാണു നിഗമനം.
ജോലിക്കു പോകുകയായിരുന്ന പെണ്കുട്ടിയെ സ്വകാര്യ സ്ഥാപനത്തിനു സമീപം റോഡില് വച്ചാണ് ബൈക്കിലെത്തിയ അമല് പിന്നില്നിന്നു കത്തികൊണ്ടു കുത്തിയത്. കഴുത്തിനും വയറിനും നിരവധി കുത്തുകളേറ്റു. കരച്ചില് കേട്ടു പരിസരവാസികള് എത്തിയപ്പോഴേക്കും ബൈക്ക് ഉപേക്ഷിച്ചു പ്രതി ഓടി രക്ഷപ്പെട്ടു.