പ്രധാനമന്ത്രി നരേന്ദ്ര മോദി തിങ്കളാഴ്ച സൗദിയിലെത്തും
റിയാദ്: റിയാദ് ആഗോള നിക്ഷേപക സംഗമത്തില്‍ പങ്കെടുക്കാന്‍ പ്രധാനമന്ത്രി നരേന്ദ്ര മോദി തിങ്കളാഴ്ച സൗദിയിലെത്തും. ചൊവ്വാഴ്ചയാണ് ‘ഫ്യൂച്ചര്‍ ഇന്‍വെസ്റ്റ്മന്റ്റ് ഇനിഷ്യേറ്റിവ്’ എന്ന പേരില്‍ നിക്ഷേപകസംഗമം മൂന്നാം പതിപ്പ് ആരംഭിക്കുന്നത്.
സമ്മേളനത്തില്‍ പങ്കെടുക്കുന്ന ഇന്ത്യന്‍ പ്രധാനമന്ത്രി സൗദി ഭരണാധികാരി സല്‍മാന്‍ രാജാവുമായും കിരീടാവകാശി അമീര്‍ മുഹമ്മദുമായും ചര്‍ച്ച നടത്തും. ഇന്ത്യ-സൗദി വ്യാപാര കരാറുകളിലും ഒപ്പുവെക്കും. പാക് പ്രധാനമന്ത്രി ഇംറാന്‍ഖാനും സമ്മേളനത്തിലെത്തുമെന്നാണ് വിവരം. കഴിഞ്ഞ വര്‍ഷവും ഇംറാന്‍ ഖാന്‍ പരിപാടിയില്‍ സംബന്ധിച്ചിരുന്നു. സൗദിയിലെ നിക്ഷേപ സാധ്യത പരിചയപ്പെടുത്തുന്നതാണ് ഫ്യൂച്ചര്‍ ഇന്‍വെസ്റ്റ്മെന്‍റ് ഇനിഷ്യേറ്റിവ്.
29 മുതല്‍ 31 വരെയാണ് സമ്മേളനം. 28ന് റിയാദിലെത്തുന്ന പ്രധാനമന്ത്രി 29ന് രാത്രി മടങ്ങും. 29 നാണ് സല്‍മാന്‍ രാജാവുമായും കിരീടാവകാശി മുഹമ്മദ് ബിന്‍ സല്‍മാനുമായും മോദി ചര്‍ച്ച നടത്തുക.
