ഫെഡറേഷൻ കപ്പ് അത്ലറ്റിക്സ്: കേരളത്തിന് സ്വർണം
തിരുവണ്ണാമലൈ: ഫെഡറേഷൻ കപ്പ് ജൂനിയർ അത്ലറ്റിക് മീറ്റിന്റെ രണ്ടാംദിനം കേരളത്തിന് സ്വർണം. പെൺകുട്ടികളുടെ 100 മീറ്റർ ഹർഡിൽസിൽ കേരളത്തിന്റെ അപർണ റോയിയാണ് സ്വർണം നേടിയത്.
ആദ്യദിനം ഒരു വെള്ളിയും രണ്ടു വെങ്കലവും മാത്രമായിരുന്നു കേരളത്തിന് നേടാനായത്. അണ്ടർ 20 പെൺ വിഭാഗം ലോംഗ്ജപിൽ നാട്ടിക ഗവ. ഫിഷറീസ് സ്കൂളിലെ ആൻസി സോജനാണ് വെള്ളി നേടിയത്. 100 മീറ്ററിൽ തിരുവനന്തപുരം എൽഎൻസിപിയിലെ ആദിത്യ കുമാർ സിംഗും ഹൈജംപിൽ കോതമംഗലം എംഎ കോളജിലെ ടി.എൻ. ദിൽഷിത്തുമാണ് വെങ്കലം നേടിയത്.
കഴിഞ്ഞ രണ്ടു തവണ നഷ്ടമായ കിരീടം ലക്ഷ്യമിട്ടാണ് കേരളം ഇറങ്ങിയിരിക്കുന്നത്. ബംഗളൂരുവിൽ കിരീടമുയർത്തിയ കേരളത്തിന് ലക്നോവിലും കഴിഞ്ഞ വർഷം കോയമ്പത്തൂരിലും അടിപതറി. ഇത്തവണയും ഹരിയാനയും യുപിയും ആതിഥേയരായ തമിഴ്നാടുമാണ് കേരളത്തിനു മുന്നിലെ കടമ്പകൾ.