കർണാടകയിൽ രാഷ്ട്രപതി ഭരണത്തിന് നീക്കമെന്ന് കോൺഗ്രസ്
കർണാടകയിൽ സഖ്യസർക്കാർ വെള്ളിയാഴ്ച ഉച്ചയ്ക്ക് മുൻപ് ഭൂരിപക്ഷം തെളിയിക്കണമെന്ന ഗവർണറുടെ നിർദേശത്തിനെതിരെ കോൺഗ്രസ്. സംസ്ഥാനത്ത് രാഷ്ട്രപതി ഭരണം ഏർപ്പെടുത്താൻ ഗൂഢനീക്കം നടക്കുന്നുണ്ടെന്ന് കോൺഗ്രസ് ആരോപിച്ചു. ഇതിന്‍റെ ഭാഗമാണ് ഗവർണറുടെ നിർദേശമെന്നും കോൺഗ്രസ് കുറ്റപ്പെടുത്തി. ഇതിനിടെ, പ്രതിസന്ധികൾക്കും തര്‍ക്കങ്ങൾക്കും ഇടയിൽ കര്‍ണാടക നിയമസഭ സമ്മേളനം തുടങ്ങുകയും ചെയ്തു. ഭൂരിപക്ഷം തെളിയിക്കണമെന്ന ഗവര്‍ണറുടെ ആവശ്യം തള്ളിയ സ്പീക്കര്‍ കെ.ആർ.രമേഷ് കുമാർ വിശ്വാസ പ്രമേയത്തിലുള്ള ചര്‍ച്ച മാത്രമാണ് ഇന്നത്തെ അജണ്ടയെന്ന് നിയമസഭയെ അറിയിച്ചു. പ്രതിപക്ഷം ഇതിനോട് സഹകരിക്കണമെന്നും സ്പീക്കര്‍ ആവശ്യപ്പെട്ടു.
