കണ്ണൂരിൽ ഓറഞ്ച് അലേര്ട്ട് : ജാഗ്രതാ നിർദ്ദേശം നൽകി അധികൃതർ
കണ്ണൂർ : ജില്ലയില് ജൂണ് 12ന് ഓറഞ്ച് അലേര്ട്ട് പ്രഖ്യാപിച്ചു. ഈ സാഹചര്യത്തില് ജില്ലയില് ഒറ്റപ്പെട്ടയിടങ്ങളില് ശക്തമായതോ അതിശക്തമായതോ (115 മി.മീ മുതല് 204.5 മി.മീ വരെ) മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് അറിയിച്ചു. അതിനാല് ജനങ്ങള് ജാഗ്രത പാലിക്കണമെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നല്കി. ജൂണ് 14 വരെ ജില്ലയില് യെല്ലോ അലേര്ട്ടും പ്രഖ്യാപിച്ചിട്ടുണ്ട്.
ഓറഞ്ച്, മഞ്ഞ അലേര്ട്ടുകള് പ്രഖ്യാപിച്ച ജില്ലകളില് പ്രളയ സാധ്യതയുള്ള പ്രദേശങ്ങളില് താമസിക്കുന്നവര്, 2018 ലെ പ്രളയത്തില് വെള്ളം കയറിയ പ്രദേശങ്ങളില് താമസിക്കുന്നവര്, അടച്ചുറപ്പില്ലാത്ത വീടുകളില് താമസിക്കുന്നവര്, ഉരുള്പൊട്ടല് സാധ്യതയുള്ള പ്രദേശങ്ങളില് താമസിക്കുന്നവര്, 2018 ല് ഉരുള്പൊട്ടലുണ്ടാവുകയോ ജിയോളജിക്കല് സര്വേ ഓഫ് ഇന്ത്യ വാസയോഗ്യമല്ലാത്തതെന്ന് കണ്ടെത്തിയ പ്രദേശങ്ങളില് താമസിക്കുന്നവര്, പ്രളയത്തിലും ഉരുള്പൊട്ടലിലുമായി പൂര്ണമായി വീട് നഷ്ടപ്പെടുകയും ഇതുവരെ പണി പൂര്ത്തീകരിക്കാത്ത വീടുകളില് താമസിക്കുന്നവര്, പ്രളയത്തില് ഭാഗികമായി കേടുപാടുകള് സംഭവിക്കുകയും അറ്റകുറ്റപ്പണികള് ഇത് വരെ നടത്തിത്തീര്ക്കാത്തതുമായ വീടുകളില് താമസിക്കുന്നര് എന്നിവര് പ്രധാനപ്പെട്ട രേഖകളും വിലപ്പെട്ട വസ്തുക്കളും ഉള്പ്പെടുന്ന ഒരു എമര്ജന്സി കിറ്റ് തയ്യാറാക്കി വെക്കുകയും മാറി താമസിക്കേണ്ട സാഹചര്യം വരികയാണെങ്കില് അധികൃതര് നിര്ദേശിക്കുന്ന സുരക്ഷിത സ്ഥാനത്തേക്ക് മാറിത്താമസിക്കാന് തയ്യാറാവുകയും വേണം. ഇത്തരം ആളുകള്ക്ക് വേണ്ടി സ്ഥിതഗതികള് വിലയിരുത്തിക്കൊണ്ട് ആവശ്യമായ ക്യാമ്പുകള് ആരംഭിക്കുന്നതിനുള്ള നിര്ദേശങ്ങള് സര്ക്കാര് പുറപ്പെടുവിച്ചിട്ടുണ്ട്.