സമരം; ബംഗാളിൽ 300 സർക്കാർ ഡോക്ടർമാർ രാജിവെച്ചു

കൊൽക്കത്ത: ജൂനിയർ ഡോക്ടർമാരുടെ സമരത്തിന് ഐക്യദാർഢ്യം പ്രഖ്യാപിച്ച് ബംഗാളിലെ സർക്കാർ ആശുപത്രികളിൽ കൂട്ടിരാജി. മുന്നൂറോളം ഡോക്ടർമാരാണ് രാജിവെച്ചത്. മെഡിക്കൽ കോളേജുകളിലെ ഡിപ്പാർട്ട്മെന്റ് തലവൻന്മാർ അടക്കമാണ് രാജിവെച്ചിരിക്കുന്നത്.

ഡോക്ടർമാരുടെ സമരത്തിന് ഐക്യദാർഢ്യം പ്രഖ്യാപിച്ച് രാജ്യവ്യാപകമായി ഡോക്ടർമാരുടെ പണിമുടക്കിന് ഐഎംഎ ആഹ്വാനം ചെയ്തു. ഡോക്ടർമാരുടെ സുരക്ഷ ഉറപ്പുവരുത്തുന്നതിന് പ്രധാനമന്ത്രി നരേന്ദ്ര മോദിയും ആഭ്യന്തര മന്ത്രി അമിത് ഷായും ഇടപെട്ട് നിയമ നിർമ്മാണം നടത്തണമെന്നാണ് ഐഎംഎയുടെ ആവശ്യം.

വിഷയം അഭിമാന പ്രശ്നമായെടുത്ത് വഷളാക്കരുതെന്ന് കേന്ദ്ര ആരോഗ്യ മന്ത്രി ഡോ ഹർഷവർധൻ മമതയോട് അഭ്യർത്ഥിച്ചു. പ്രശ്ന പരിഹാരത്തിനു പകരം ഡോക്ടർമാർക്ക് അന്ത്യശാസനം നൽകിയതാണ് പ്രശ്നം ഇത്രത്തോളം വഷളാക്കിയതെന്നും അദ്ദേഹം പറഞ്ഞു. രാജ്യത്തെ ഡോക്ടർമാരുടെ സുരക്ഷ ഉറപ്പുവരുത്തുന്നതിൽ സർക്കാർ പ്രതിജ്ഞാബന്ധമാണെന്നും അദ്ദേഹം പറഞ്ഞു.