മണ്സൂണ് മഴക്കാലം ജൂണ് നാലു മുതല് തുടങ്ങും
തിരുവനന്തപുരം: ജൂണ് നാലിന് കേരളത്തില് മണ്സൂണ് മഴക്കാലം തുടങ്ങുമെന്ന് സ്വകാര്യ കാലാവസ്ഥാ നിരീക്ഷണ കേന്ദ്രം അറിയിച്ചു. സാധാരണ ജൂണ് ഒന്നിനാണ് മഴ എത്തേണ്ടതെങ്കിലും മൂന്ന് ദിവസം വൈകിയേ മഴയെത്തൂവെന്നാണ് റിപ്പോര്ട്ട്.ഇന്ത്യയില് മണ്സൂണ് മഴക്കാലം ആദ്യം എത്തുന്നത് ആന്തമാന് നിക്കോബാര് ദ്വീപുകളിലാണ്. മെയ് 22 ന് ഇവിടെ മണ്സൂണ് മഴ പെയ്ത് തുടങ്ങും. എന്നാല് ഇന്ത്യയില് നാല് മേഖലകളിലും ശരാശരിയില് കുറവ് മഴ മാത്രമേ ലഭിക്കൂവെന്നും റിപ്പോര്ട്ട് വ്യക്തമാക്കുന്നുണ്ട്.ഇന്ത്യയുടെ കിഴക്ക്, വടക്കുകിഴക്ക്, മധ്യ മേഖലകളിലുള്ള സംസ്ഥാനങ്ങളില് ദക്ഷിണേന്ത്യയില് ലഭിക്കുന്നതിനേക്കാള് വളരെ കുറവ് മഴ മാത്രമേ ലഭിക്കൂ. കഴിഞ്ഞ ആഴ്ച സ്വകാര്യ ഏജന്സിയായ സ്കൈമെറ്റ് പുറത്തുവിട്ട റിപ്പോര്ട്ടില് ശരാശരി മഴ ലഭിക്കുമെന്ന് പറഞ്ഞിരുന്നു. എന്നാല് മാറിയ കാലാവസ്ഥാ സാഹചര്യങ്ങളില് കുറവ് മഴ മാത്രമേ ലഭിക്കൂവെന്നാണ് വ്യക്തമാക്കിയിരിക്കുന്നത്.