യുഎഇ ഡ്രൈവിങ് ലൈസൻസ് പരിശീലനം ഇനി കേരളത്തിലും
അബുദാബി: യുഎഇ പ്രവാസികള്‍ക്ക് നാട്ടിൽ നിന്ന് തന്നെ ലൈസൻസ് എടുക്കാൻ പരിശീലനം നേടാൻ അവസരമൊരുങ്ങുന്നു. ഇന്ത്യയിലെ നാഷണൽ സ്കിൽ ഡെവലപ്മെന്‍റ് കോര്‍പ്പറേഷനും എമിറേറ്റ്സ് ഡ്രൈവിങ് ഇൻസ്റ്റിറ്റ്യൂട്ടും ചേര്‍ന്നാണ് ഇതിനുള്ള സൗകര്യമൊരുക്കുന്നത്. ഇരു ഏജൻസികളും പുതിയ പദ്ധതിയ്ക്കായുള്ള ധാരണാപത്രത്തിൽ ഒപ്പിട്ടു.
രാജ്യത്തെ വിവിധ കേന്ദ്രങ്ങളിൽ പ്രവര്‍ത്തിക്കുന്ന ഡ്രൈവിങ് സ്കൂളുകള്‍ വഴിയായിരിക്കും യുഎഇ ഡ്രൈവിങ് പരിശീലനം നല്‍കുക. ഇന്ത്യയിൽ പരിശീലനം പൂര്‍ത്തിയാക്കിയ ശേഷം യുഎഇയിലെത്തി ടെസ്റ്റിൽ പങ്കെടുക്കാനും സാധിക്കും. യുഎഇയിൽ ഡ്രൈവിങ് പരീക്ഷയ്ക്ക് ഹാജരാകും മുൻപ് പൂര്‍ത്തിയാക്കേണ്ട പരിശീലനം ഇന്ത്യയിൽ ലഭ്യമാക്കുന്നതിനാണ് സംവിധാനമെന്ന് നാഷണൽ സ്കിൽ ഡെവലപ്മെന്‍റ് കോര്‍പ്പറേഷൻ എം ഡി ഡോ. മനീഷ് കുമാര്‍ പറഞ്ഞു. ഇവിടെ പരിശീലനം പൂര്‍ത്തിയാക്കുന്നവര്‍ക്ക് അതിന്‍റെ സര്‍ട്ടിഫിക്കറ്റായിരിക്കും നല്‍കുക. യുഎഇയിൽ എത്തിയ ശേഷം എമിറേറ്റ്സ് ഡ്രൈവിങ് സ്കൂള്‍ ക്യാംപസുകള്‍ വഴി തുടര്‍നടപടികള്‍ പൂര്‍ത്തിയാക്കാം. പുതിയ പദ്ധതി വരുന്നതോടെ യുഎഇ ലൈസൻസ് നേടാനുള്ള പണച്ചെലവിൽ കുറവുണ്ടാകുന്നതോടൊപ്പം സമയലാഭവുമുണ്ടെന്ന് അദ്ദേഹം പറഞ്ഞു.
കേരളത്തിനു പുറമെ പ്രവാസികള്‍ കൂടുതലുള്ള പഞ്ചാബ്, ആന്ധ്രാ പ്രദേശ്, ഓഡീഷ എന്നിവിടങ്ങളിൽ ഡ്രൈവിങ് പരിശീലനകേന്ദ്രങ്ങള്‍ ആരംഭിക്കും. ആദ്യഘട്ടത്തിൽ നിലവിലുള്ള ഡ്രൈവിങ് സ്കൂളുകളിൽ ലെഫ്റ്റ് ഹാൻഡ് ഡ്രൈവിങ് ഉള്‍പ്പെടെയുള്ളവ പരിശീലിപ്പിക്കും. അടുത്ത ഘട്ടത്തിൽ സൗദി അറേബ്യ ഉള്‍പ്പെടെയുള്ള മറ്റു ജിസിസി രാജ്യങ്ങള്‍ക്ക് ആവശ്യമായ ഡ്രൈവിങ് പരിശീലനം ഒരുക്കുന്ന തരത്തിലേയ്ക്കും പദ്ധതി വ്യാപിപ്പിക്കുമെനന് നാഷണൽ സ്കിൽ ഡെവലപ്മെന്‍റ് കോര്‍പ്പറേഷൻ അറിയിച്ചു.
