മോദിയുടെ സത്യപ്രതിജ്ഞ: കൊടിക്കുന്നിൽ പ്രോ ടൈം സ്പീക്കറാകും
കൊട്ടാരക്കര: നരേന്ദ്ര മോദി വീണ്ടും പ്രധാനമന്ത്രിയായി സത്യപ്രതിജ്ഞ ചെയ്യുമ്പോള്‍ സത്യപ്രതിജ്ഞ ചൊല്ലിക്കൊടുക്കാനുള്ള ചുമതല കോൺഗ്രസ് എംപി കൊടിക്കുന്നിൽ സുരേഷനിന് ലഭിക്കുമെന്ന് സൂചന. ലോക്സഭാംഗങ്ങളിൽ ഏറ്റവും സീനിയോരിറ്റിയുള്ള അംഗത്തെ പ്രോ ടൈം സ്പീക്കറാക്കുക എന്ന ചട്ടം അനുസരിച്ചാണ് കൊടിക്കുന്നിൽ സുരേഷിന് അവസരം കൈവരിക. മാവേലിക്കര എംപിയാണ് കൊടിക്കുന്നിൽ സുരേഷ്.
കഴിഞ്ഞ ലോക്സഭയിൽ കര്‍ണ്ണാടകയിൽ നിന്നുള്ള ലോക്സഭാംഗമായ മുനിയപ്പയായിരുന്നു സീനിയര്‍ അംഗമെന്ന നിലയിൽ പ്രോടൈം സ്പീക്കറായത്. എന്നാൽ ഈ തെരഞ്ഞെടുപ്പിൽ മുനിയപ്പ ജയിക്കാതിരുന്നതോടെയാണ് ചുമതല കൊടിക്കുന്നിലിനെ തേടിയെത്തുന്നത്.
സിപിഐ സ്ഥാനാര്‍ത്ഥി ചിറ്റയം ഗോപകുമാറിനെ തകര്‍ത്താണ് മാവേലിക്കര മണ്ഡലത്തിൽ നിന്ന് കൊടിക്കുന്നിലിന്‍റെ ജയം. സിപിഎ സ്ഥാനാര്‍ത്ഥിയ്ക്ക് 3,79,277 വോട്ടുകളാണ് നേടിയതെങ്കിൽ കോൺഗ്രസ് സ്ഥാനാര്‍ത്ഥിയായ കൊടിക്കുന്നിൽ സുരേഷിന് 4,44,415 വോട്ടുകളാണ് ലഭിച്ചത്. എൻഡിഎ സ്ഥാനാര്‍ത്ഥി തഴവ സഹദേവൻ മൂന്നാം സ്ഥാനത്താണ് എത്തിയത്.
