പ്രധാനമന്ത്രിയുടെ വേദിയിൽ തീ പിടുത്തം
പ്രധാനമന്ത്രി നരേന്ദ്ര മോദി പ്രസംഗിക്കുന്ന വേദിക്കു തീപിടിച്ചു. ഉത്തർപ്രദേശിലെ അലിഗഡിൽ ഞായറാഴ്ച ബിജെപിയുടെ തെരഞ്ഞെടുപ്പ് റാലിയിൽ സംസാരിക്കവെയാണ് മോദി പ്രസംഗിച്ചിരുന്ന വേദിക്കു താഴെ തീപിടിച്ചത്. സുരക്ഷാസേന തീപിടിച്ച ഉടൻ തന്നെ തീയണച്ചു.
വേദിയിലുണ്ടായിരുന്ന എസിയിലേക്ക് വൈദ്യുതി എത്തിച്ച വയർ ചൂടുപിടിച്ച് കത്തിയതാണ് തീപിടിക്കാൻ കാരണമെന്നും നാശനഷ്ടങ്ങളൊന്നുമുണ്ടായില്ലെന്നും സീനിയർ പോലീസ് സൂപ്രണ്ടന്റ് ആകാശ് കുൽഹാരി അറിയിച്ചു. തീപിടിച്ചെങ്കിലും മോദിയുടെ പ്രസംഗത്തിനു തടസമുണ്ടായില്ല.
സംഭവത്തിൽ, വേദിയിൽ വൈദ്യുത ഉപകരണങ്ങൾ എത്തിക്കാൻ കരാറെടുത്ത വ്യക്തിയേയും രണ്ടു തൊഴിലാളികളേയും കസ്റ്റഡിയിലെടുത്തു. ഇവർക്കെതിരെ കേസും രജിസ്റ്റർ ചെയ്തു.