കണ്ണൂരിലേക്ക് ലൈസെൻസ് ഇല്ലാതെ കടത്തിയ പടക്കം പിടികൂടി
ലൈസൻസ് ഇല്ലാതെ അശ്രദ്ധമായി പിക്കപ്പ് വാനിൽ കടത്തുകയായിരുന്ന 1091 കിലോഗ്രാം വിഷുപ്പടക്കങ്ങൾ പോലീസ് പിടികൂടി. ഡ്രൈവർ അറസ്റ്റിൽ. കാസർഗോഡുനിന്ന് താഴെചൊവ്വയിലേക്ക് പിക്കപ്പ് വാനിൽ കൊണ്ടുപോവുകയായിരുന്ന വിവിധയിനം ചൈനീസ് പടക്കങ്ങളാണ് മേലെചൊവ്വയിൽ വച്ച് ടൗൺ എസ്ഐ പ്രജീഷിന്റെ നേതൃത്വത്തിലുള്ള പോലീസ് സംഘം പിടികൂടിയത്.
സംഭവവുമായി ബന്ധപ്പെട്ട് വാൻ ഡ്രൈവർ കാസർഗോഡ് സ്വദേശി നരേന്ദ്രൻ (45) ആണ് അറസ്റ്റിലായത്. തെരഞ്ഞെടുപ്പിന്റെ പശ്ചാത്തലത്തിൽ പോലീസ് വാഹന പരിശോധന നടത്തുന്നതിനിടയിലാണ് അനധികൃതമായി കടത്തുകയായിരുന്ന പടക്കങ്ങൾ പിടികൂടിയത്. താഴെചൊവ്വയിലെ ഒരു കടയിലേക്ക് വില്പനയ്ക്കായി കൊണ്ടുവരികയായിരുന്നു പടക്കങ്ങളെന്ന് പോലീസ് പറഞ്ഞു. പിടികൂടിയ പടക്കങ്ങൾ കോടതിക്ക് കൈമാറും.