വാഹനത്തിൽ നിന്നും വീണ മാധ്യമ പ്രവർത്തകനെ ആംബുലൻസിൽ കയറ്റിയത് പ്രിയങ്ക ഗാന്ധിയും രാഹുലും ചേർന്ന്. ദൃശ്യങ്ങൾ കാണാം
കൽപറ്റ: റോഡ് ഷോയ്ക്കിടെ വാഹനത്തിൽ നിന്ന് വീണ മാധ്യമപ്രവർത്തകരെ സഹായിക്കാൻ ഓടിയെത്തി കോൺഗ്രസ് അധ്യക്ഷൻ രാഹുൽ ഗാന്ധിയും പ്രിയങ്ക ഗാന്ധി വാദ്രയും.
വയനാട് ലോക്സഭ മണ്ഡലത്തിൽ സ്ഥാനാർഥിയായി നാമനിർദ്ദേശ പത്രിക സമർപ്പിച്ച ശേഷം സംഘടിപ്പിച്ച റോഡ് ഷോയ്ക്കിടെ ആയിരുന്നു സംഭവം. ന്യൂസ് 9 റിപ്പോർട്ടർ സുപ്രിയ, ഇന്ത്യ എഹഡ് കേരളാ റിപ്പോർട്ടർ റിറ്റ്സൻ ഉമ്മൻ എന്നിവർക്കാണ് പരിക്കേറ്റത്. ഇരുവരെയും കൽപ്പറ്റ ലിയോ ആശുപത്രിയിൽ പ്രവേശിപ്പിച്ചു.മാധ്യമ പ്രവർത്തകർ വീണത് ശ്രദ്ധയിൽപെട്ട രാഹുൽ ഗാന്ധിയും എ.ഐ.സി.സി ജനറൽ സെക്രട്ടറി പ്രിയങ്കാ ഗാന്ധിയുമടക്കമുള്ളവർ അവർക്കരികിലേക്ക് ഓടിയെത്തുകയും പിടിച്ച് എഴുന്നേൽപ്പിക്കാൻ സഹായിക്കുകയും അവർക്ക് വെള്ളം നൽകുകയും ചെയ്തു.പരിക്കേറ്റ ഇന്ത്യ എഹഡ് കേരളാ റിപ്പോർട്ടർ റിറ്റ്സൻ ഉമ്മനെ ആശുപത്രിയിൽ എത്തിക്കുന്നതിനായി ആംബുലൻസിലേക്ക് കയറ്റാനും രാഹുൽ സഹായിച്ചു. ഈ സമയം പ്രിയങ്കാ ഗാന്ധിയാണ് റിറ്റ്സൻെറ ഷൂ കൈയിലെടുത്തത്. റോഡ് ഷോയുടെ ദൃശ്യങ്ങൾ പകർത്തുന്നതിനിടെ മാധ്യമപ്രവർത്തകർ സഞ്ചരിച്ച വാഹനത്തിൻെറ ബാരിക്കേഡ് തകർന്നതോടെയാണ് വനിതാ മാധ്യമപ്രവർത്തകയടക്കമുള്ളവർ താഴേക്ക് വീണത്.