പയ്യന്നൂരിൽ മോട്ടോർ വാഹന എൻഫോഴ്‌സ്‌മെന്റിന്റെ മിന്നൽ റെയ്‌ഡ്‌ ; 60 ബസ്സുകൾക്കെതിരെ കേസ്
മോട്ടോര്‍ വാഹന വകുപ്പ് എന്‍ഫോഴ്‌സ്‌മെന്‍റ് സ്‌ക്വാഡ് നടത്തിയ മിന്നല്‍പരിശോധനയില്‍ 60 ബസുകള്‍ക്കെതിരേ കേസ്. തളിപ്പറമ്പ്, പയ്യന്നൂര്‍ എന്നിവിടങ്ങളിലായിരുന്നു പരിശോധന. മോട്ടോര്‍ വാഹനവകുപ്പിലെ എന്‍ഫോഴ്‌സ്‌മെന്‍റ് വിഭാഗം ശക്തിപ്പെടുത്തുന്നതിന് സേഫ് കേരള പദ്ധതിയുടെ ഭാഗമായി രൂപീകരിച്ച സ്ക്വാഡുകളുടെ നേതൃത്വത്തിലായിരുന്നു പരിശോധന നടത്തിയത്. പല ബസുകളിലും എയര്‍ഹോണ്‍ ഘടിപ്പിച്ചതായും ആവശ്യമായ രേഖകളില്ലാത്തതായും പരിശോധനയില്‍ കണ്ടെത്തി. ചില ബസുകളില്‍ കണ്ടെത്തിയ മ്യൂസിക് സിസ്റ്റം അഴിച്ചുമാറ്റി. കാഴ്ചയ്ക്കു തടസമാകുന്ന അലങ്കാരങ്ങളും നീക്കംചെയ്തു.
അന്ധര്‍, സ്ത്രീകള്‍, വികലാംഗര്‍, മുതിര്‍ന്ന പൗരന്മാര്‍ തുടങ്ങിയ സംവരണങ്ങള്‍ ചില ബസുകളില്‍ രേഖപ്പെടുത്തിയിട്ടില്ലെന്നും പരിശോധനയില്‍ കണ്ടെത്തി. ഇതേത്തുടര്‍ന്നാണ് 60 ബസുകള്‍ക്കെതിരേ സ്‌പെഷല്‍ സ്‌ക്വാഡ് കേസെടുത്തത്. മൂന്നുദിവസത്തിനകം അതത് ആര്‍ടിഒ ഓഫീസുകളില്‍ ഈ ബസുകള്‍ പരിശോധനയ്ക്കു ഹാജരാക്കണമെന്ന കര്‍ശന നിര്‍ദേശവും നല്‍കിയിട്ടുണ്ട്.
എംവിഐമാരായ പി.സുധാകരന്‍, പി.ശ്രീനിവാസന്‍, എന്‍.ആര്‍. റിജിന്‍, ടി.പി.വത്സരാജന്‍ എന്നിവരുടെ നേതൃത്വത്തില്‍ പതിനഞ്ച് എഎംവിമാരടങ്ങുന്ന സംഘമാണ് പരിശോധന നടത്തിയത്. എന്‍ഫോഴ്‌സ്‌മെന്‍റ് സ്‌ക്വാഡിന്‍റെ പരിശോധന വരുംദിവസങ്ങളിലും തുടരുമെന്ന് ആര്‍ടിഒ എം.പി.സുഭാഷ് പറഞ്ഞു.
