കൊട്ടിയൂരിൽ ഔട്ടോ ടാക്സി മറിഞ്ഞ് 2 പേർ മരിച്ചു
മാനന്തവാടി വള്ളിയൂർകാവ് ഉത്സവം കഴിഞ്ഞ് മടങ്ങിയവർ സഞ്ചരിച്ച കോൾ ടാക്സി മറിഞ്ഞ് രണ്ടുപേർ മരിച്ചു. മൂന്നു പേർക്ക് പരിക്കേറ്റു. ഡ്രൈവർ ബാവലി പെരുവക സ്വദേശി രമേശ് ബാബു (38) , യാത്രക്കാരി ആറളംഫാം പതിനൊന്നാം ബ്ലോക്കിലെ ശാന്ത എന്നിവരാണ് മരിച്ചത്.
ആറളംഫാം പതിനൊന്നാം ബ്ലോക്കിലെ രാജു (45), സീത (31), അപർണ (14) എന്നിവർക്ക് പരിക്കേറ്റു. വെള്ളിയാഴ്ച രാവിലെ ഏഴിന് കൊട്ടിയൂർ – ബോയ്സ് ടൗൺ ചുരം റോഡിലെ ആശ്രമം ജംഗ്ഷന് സമീപമായിരുന്നു അപകടം. കോൾടാക്സിയിൽ ഡ്രൈവർ ഉൾപ്പെടെ ആറുപേരാണ് ഉണ്ടായിരുന്നത്. ഒരാൾ പരിക്കേൽക്കാതെ രക്ഷപ്പെട്ടു.
പരിക്കേറ്റ രണ്ടുപേരുടെ നില ഗുരുതരമാണ്. ഇവരെ വിവിധ ആശുപത്രികളിൽ പ്രവേശിപ്പിച്ചു. ഉത്സവം കഴിഞ്ഞ് ആറളം ഫാമിലേക്ക് വരുന്നതിനിടെ ആശ്രമം ജംഗ്ഷന് സമീപത്തെ ഫോറസ്റ്റ് ക്വാർട്ടേഴ്സിന്റെ മുമ്പിലെ വളവിൽ നിയന്ത്രണം വിട്ട കോൾടാക്സി താഴ്ചയിലേക്ക് മറിയുകയായിരുന്നു.