ഒന്നൊന്നര ഹാക്കിങ് ; തിരിച്ചെടുക്കാനാകാതെ ബിജെപി വെബ്സൈറ്റ്
ഹാക്കർമാർ തകർത്ത ബിജെപി വെബ്സൈറ്റ് രണ്ടാഴ്ചയ്ക്കു ശേഷവും പൂർണമായും വീണ്ടെടുക്കാനായില്ല. ലോക്സഭാ തെരഞ്ഞെടുപ്പിന്റെ ആദ്യഘട്ട സ്ഥാനാർഥി പട്ടികയുമായി വെള്ളിയാഴ്ച സൈറ്റിന്റെ ഒരു പേജ് മാത്രം പ്രവർത്തനക്ഷമമായി. എന്നാൽ മുന്പ് സൈറ്റില് ഉണ്ടായിരുന്ന വിവരങ്ങളൊന്നും ഇപ്പോഴില്ല.
മോദിയുടേയും അമിത് ഷായുടേയും ചിത്രമുള്ള ഫിര് ഏക് ബാര് മോദി സര്ക്കാര് എന്ന ബാനറിനു ചുവടെ 2019 പൊതു തെരഞ്ഞെടുപ്പിലെ സ്ഥാനാര്ഥി പട്ടിക മാത്രമാണ് ഇപ്പോള് സൈറ്റിലുള്ളത്. കഴിഞ്ഞ മാര്ച്ച് അഞ്ചിനാണ് സൈറ്റ് ഹാക്കര്മാര് തകര്ക്കുന്നത്. എന്നാൽ സൈറ്റ് ഹാക്ക് ചെയ്യപ്പെട്ടെന്ന വിവരം ബിജെപി അംഗീകരിച്ചില്ല. മാർച്ച് 12 ന് കേന്ദ്രമന്ത്രി രവിശങ്കർ പ്രസാദാണ് ഇക്കാര്യം സ്ഥിരീകരിച്ചത്. സൈറ്റ് തിരിച്ചെടുക്കാനുള്ള നടപടികൾ നടന്നുവരികയാണെന്നും ഉടൻ തന്നെ തിരിച്ചെത്തുമെന്നും അദ്ദേഹം പറഞ്ഞിരുന്നു.
എന്നാൽ ആഴ്ചകൾക്കു ശേഷവും സൈറ്റിന്റെ പ്രവർത്തനം പൂർണമായും വീണ്ടെടുക്കാനായിട്ടില്ല. സാധാരണ സൈറ്റ് ഹാക്ക് ചെയ്യപ്പെടുമ്പോള് ഹോം പേജ് വികൃതമാക്കുന്നതില് മാത്രമൊതുങ്ങും. എന്നാല് ബിജെപി വെബ്സൈറ്റിന് നേരിട്ട ആക്രമണത്തിന്റെ ആഘാതം വലുതാണെന്ന് പിന്നീട് വ്യക്തമായി.