എടിഎമ്മുകളില്‍ 9 മണിക്ക് ശേഷം പണം നിറക്കേണ്ടെന്ന് കേന്ദ്ര ആഭ്യന്തര മന്ത്രാലയം
നഗരപ്രദേശങ്ങളിൽ രാത്രി ഒമ്പത് മണിക്ക് ശേഷവും ഗ്രാമങ്ങളിൽ ആറ് മണിക്ക് ശേഷവും എടിഎമ്മുകളിൽ പണം നിറക്കേണ്ടെന്ന് കേന്ദ്ര അഭ്യന്തര മന്ത്രാലയം ഏജന്‍സികള്‍ക്ക് നിര്‍ദേശം നല്‍കി. പ്രശ്നബാധിത മേഖലകളിൽ പ്രവർത്തിക്കുന്ന എടിഎമ്മുകളിൽ നാല് മണിക്ക് മുമ്പായി പണം നിറക്കണമെന്നും കേന്ദ്ര ആഭ്യന്തര മന്ത്രാലയം പറയുന്നു.
2019 ഫെബ്രുവരി എട്ടിന് മുമ്പ് പുതിയ നിർദേശം പ്രാവർത്തികമാക്കണമെന്നാണ് കേന്ദ്രസർക്കാറിന്‍റെ ഉത്തരവ്. ഏകദേശം 15,000 കോടിയാണ് നോൺ ബാങ്കിംഗ് സ്ഥാനങ്ങൾ പ്രതിദിനം കൈകാര്യം ചെയ്യുന്നത്. സ്വകാര്യ ഏജൻസികൾ പണം കൊണ്ടുപോകുമ്പോൾ ആവശ്യമായ സുരക്ഷ ഒരുക്കണമെന്നും നിർദേശമുണ്ട്.
നേരത്തെ എടിഎമ്മുകളിൽ പണം നിറക്കുന്നതിനുള്ള വാനുകൾ അക്രമിക്കപ്പെട്ട സംഭവങ്ങൾ റിപ്പോർട്ട് ചെയ്തിരുന്നു. ഇതേ തുടർന്നാണ് കർശന നിർദേശങ്ങളുമായി അഭ്യന്തര മന്ത്രാലയം രംഗത്തെത്തിയിരിക്കുന്നത്.
