സണ്ണി ലിയോണിനെതിരെ പ്രതിഷേധവുമായി സിഖ് സംഘടന
ബോളിവുഡ് നടി സണ്ണി ലിയോണിനെതിരേ പ്രതിഷേധവുമായി സിഖ് സംഘടന. നടിയുടെ ജീവചരിത്രത്തെ ആസ്പദമാക്കി നിർമിച്ച “കരണ്‍ജീത് കൗർ: ദി അണ്ടോൾഡ് സ്റ്റോറി ഓഫ് സണ്ണി ലിയോണ്‍’ എന്ന ചിത്ത്രിന്‍റെ പേരിലെ “കൗർ’ എന്ന പ്രയോഗത്തിനെതിരേയാണ് ശിരോമണി ഗുരുദ്വാര പർബന്ധക് കമ്മിറ്റി(എസ്ജിപിസി) എതിർപ്പുയർത്തിയിട്ടുള്ളത്.
സിഖ് ഗുരുക്കളുടെ പാത പിന്തുടരാത്ത സണ്ണിക്ക് കൗർ എന്ന പേര് ഉപയോഗിക്കാൻ അർഹതയില്ലെന്നും ഈ പ്രയോഗം സിഖ് മതവിശ്വാസങ്ങളെ ഹനിക്കുന്നതാണെന്നും എസ്ജിപിസി അഡീഷണൽ സെക്രട്ടറി ദിൽജിത് സിംഗ് ബേദി കുറ്റപ്പെടുത്തി. സണ്ണി ലിയോണ്‍ കൗർ എന്ന പേര് ഉപയോഗിക്കാൻ അനുവദിക്കില്ലെന്നും നടി പരസ്യമായി മാപ്പു പറയണമെന്നും ബേദി ആവശ്യപ്പെട്ടു.
സണ്ണി ലിയോണിന്റെ ആത്മകഥയെ ആധാരമാക്കി ആദിത്യ ദത്താണ് പരമ്പര സംവിധാനം ചെയ്യുന്നത്. സണ്ണി ലിയോണ്‍ കേവലം ഒരു പോണ്‍താരം മാത്രമായിരുന്നില്ലെന്നും അവര്‍ അങ്ങിനെയൊരു കരിയറിലെത്തപ്പെടാനും പിന്നീട് ബോളിവുഡിലേക്ക് ചുവടു വെയ്ക്കാനുമുള്ള സംഭവങ്ങള്‍ കോര്‍ത്തിണക്കി ഒരുങ്ങുന്ന വെബ് സീരീസാണ് കരണ്‍ജിത് കൗര്‍. ജൂലൈ 16 നു സീ5 വെബ് സൈറ്റില്‍ പരമ്പരയുടെ ആദ്യ ഭാഗം പ്രദര്‍ശനത്തിനെത്തും. രാജ് അര്‍ജുന്‍, കരംവീര്‍ ലാംബ, ബിജയ് ജസ്ജിത്, ഗ്രൂഷ കപൂര്‍ എന്നിവര്‍ പരമ്പരയില്‍ അഭിനയിക്കുന്നു.
