വിവിധ മേഖലകളില്‍ അറിയിപ്പ്/ സീറ്റ് ഒഴിവ്/ അഭിമുഖം/ അപേക്ഷ/ നിയമനം/ ലേലം/ ക്വട്ടേഷന്‍

മരങ്ങൾ നട്ടുവളർത്താൻ താൽപര്യമുള്ളവരെ കണ്ടെത്തി പ്രോൽസാഹിപ്പിക്കുന്നതിന്റെ ഭാഗമായി ഹരിത കേരളം മിഷൻ നടപ്പാക്കുന്ന ഓർമ്മ മരം ക്യാമ്പയിൻ ആഗസ്റ്റ് 19ന് തുടങ്ങും. രാവിലെ 10 മണിക്ക് കലക്ടറ്റേറ്റ് പരിസരത്ത് ഓർമ്മ മരം നട്ട്് ജില്ലാ പഞ്ചായത്ത് പ്രസിഡണ്ട് പി പി ദിവ്യ ഉദ്ഘാടനം ചെയ്യും. ജില്ലയിലെ വിവിധ സ്ഥാപനങ്ങൾ, സംഘടനകൾ, വ്യക്തികൾ എന്നിവയുടെ പിന്തുണയോടെയാണ് പദ്ധതി നടപ്പാക്കുക. സ്ഥാപകദിനം, ജന്മദിനം, ഓർമ്മ ദിനം, വിവാഹ വാർഷികം, വിവാഹദിനം തുടങ്ങിയ ദിനങ്ങളിൽ പൊതുസ്ഥലങ്ങളിലോ സ്വകാര്യ സ്ഥലങ്ങളിലോ തൈകൾ നട്ടുപിടിപ്പിച്ച്  വൃക്ഷവത്കരണം പ്രോൽസാഹിപ്പിക്കും. ആന്തൂർ നഗരസഭ, പെരളശ്ശേരി, വേങ്ങാട്, നാറാത്ത് ഗ്രാമ പഞ്ചായത്തുകൾ എന്നിവിടങ്ങളിലെ മുഴുവൻ വാർഡുകളിലും തൈകൾ നടും. ഇരിട്ടി നഗരസഭ, മുഴക്കുന്ന്, കേളകം, ചപ്പാരപ്പടവ്, കണ്ണപുരം, ഏഴോം, കണിച്ചാർ, അഴീക്കോട്, ചിറക്കൽ, കൂടാളി, കീഴല്ലൂർ, മലപ്പട്ടം, പടിയൂർ-കല്യാട്, ചെറുകുന്ന്, കതിരൂർ, പന്ന്യന്നൂർ, മൊകേരി, ചൊക്ലി, എരഞ്ഞോളി, പിണറായി തുടങ്ങിയ ഗ്രാമപഞ്ചായത്തുകളിലായി 150 മരങ്ങളാണ് നടുക.

ബോണസ് തർക്കം ഒത്തുതീർന്നു

ജില്ലയിലെ വിവിധ സ്ഥാപനങ്ങളിൽ സെക്യുരിറ്റി മേഖലയിൽ ജോലി ചെയ്യുന്ന തൊഴിലാളികളുടെ 2022-23 വർഷത്തെ ബോണസ് തർക്കം ജില്ലാ ലേബർ ഓഫീസർ എം മനോജിന്റെ സാന്നിധ്യത്തിൽ നടന്ന തൊഴിലാളി-തൊഴിലുടമകളുടെ യോഗത്തിൽ ഒത്തുതീർന്നു. ഒത്തുതീർപ്പ് വ്യവസ്ഥയനുസരിച്ച് 7,000 രൂപ ബോണസായി നൽകാൻ തീരുമാനമായി. യോഗത്തിൽ തൊഴിലുടമകളെ പ്രതിനിധീകരിച്ച് ടി എം രവീന്ദ്രൻ നമ്പ്യാർ, എം നരേന്ദ്രൻ, യൂണിയനെ പ്രതിനിധീകരിച്ച് കെ മോഹനൻ, കെ പി രാജൻ എന്നിവർ പങ്കെടുത്തു.

മുഴപ്പിലങ്ങാട് ബീച്ചിലെ വാഹന നിയന്ത്രണം പിൻവലിച്ചു

പ്രതികൂല കാലാവസ്ഥ കണക്കിലെടുത്ത് മുഴപ്പിലങ്ങാട് ഡ്രൈവ് ഇൻ ബീച്ചിലേക്ക് വാഹനങ്ങൾ പ്രവേശിക്കുന്നതിന് ഏർപ്പെടുത്തിയ നിയന്ത്രണം മഴ കുറഞ്ഞ സാഹചര്യത്തിൽ പിൻവലിച്ചതായി ഡി ടി പി സി സെക്രട്ടറി അറിയിച്ചു. അപകടം ഒഴിവാക്കാൻ ജീവനക്കാരുടെ നിർദേശങ്ങൾ പാലിക്കണമെന്നും സെക്രട്ടറി അറിയിച്ചു.

സീറ്റൊഴിവ്

തലശ്ശേരി ഗവ. കോളേജിൽ ബി എ ഹിസ്റ്ററി, ബികോം, ബി സി എ കോഴ്‌സുകളിൽ എസ് സി, എസ് ടി, പി ഡബ്ല്യു ഡി വിഭാഗങ്ങളിൽ സീറ്റൊഴിവ്. ആഗസ്റ്റ് 21ന് വൈകിട്ട് അഞ്ച് മണി വരെ അപേക്ഷ സ്വീകരിക്കും.  ഫോൺ: 0490 2966800, 9188900210.

സംരംഭക ബോധവത്കരണ ശിൽപ്പശാല

ജില്ലാ വ്യവസായ കേന്ദ്രത്തും കണിച്ചാർ ഗ്രാമപഞ്ചായത്തും ചേർന്ന് സംരംഭക ബോധവത്കരണ ശിൽപ്പശാല സംഘടിപ്പിക്കുന്നു. ആഗസ്റ്റ് 18ന് രാവിലെ 11 മണിക്ക് പഞ്ചായത്ത് ഹാളിൽ  പഞ്ചായത്ത് പ്രസിഡണ്ട് ആന്റണി സെബാസ്റ്റ്യൻ ഉദ്ഘാടനം ചെയ്യും. ഫോൺ: 9567982066.
ജില്ലാ വ്യവസായ കേന്ദ്രത്തിന്റെയും കുന്നോത്തുപറമ്പ് ഗ്രാമപഞ്ചായത്തിന്റെയും ആഭിമുഖ്യത്തിൽ ആഗസ്റ്റ് 18ന് ഉച്ചക്ക് രണ്ട് മണിക്ക് സംരംഭക ബോധവത്കരണ ശിൽപ്പശാല സംഘടിപ്പിക്കും. പഞ്ചായത്ത് ഹാളിൽ പ്രസിഡണ്ട് കെ ലത ഉദ്ഘാടനം ചെയ്യും. ഫോൺ: 9526649981.
ജില്ലാ വ്യവസായ കേന്ദ്രത്തിന്റെയും മുഴക്കുന്ന്് ഗ്രാമപഞ്ചായത്തിന്റെയും ആഭിമുഖ്യത്തിൽ ആഗസ്റ്റ് 19ന് രാവിലെ 10.30ന് സംരംഭക ബോധവൽക്കരണ ശിൽപശാല സംഘടിപ്പിക്കും. കാക്കയങ്ങാട് പാർവ്വതി ഓഡിറ്റോറിയത്തിൽ പഞ്ചായത്ത് പ്രസിഡണ്ട് ടി ബിന്ദു ഉദ്ഘാടനം ചെയ്യും. ഫോൺ: 8590883480.

കാർഷിക സംരംഭകർക്ക് അഗ്രോ കോൺക്ലേവ്

പിലിക്കോട് ഉത്തരമേഖലാ പ്രാദേശിക ഗവേഷണ കേന്ദ്രം, കണ്ണൂർ സർവ്വകലാശാല, കിസാൻവാണി, ടെക്‌റ്റേൺ പ്രൈവറ്റ് ലിമിറ്റഡ്, ബിസിനസ് ഇൻക്യുബേഷൻ സെന്റർ എന്നിവ നൂതന കാർഷിക സംരംഭകർക്കായി അഗ്രോ കോൺക്ലേവ് സംഘടിപ്പിക്കുന്നു. ആഗസ്റ്റ് 18ന് ഉച്ചക്ക് രണ്ട് മുതൽ വൈകീട്ട് അഞ്ച് മണി വരെ പിലിക്കോട് ഗവേഷണ കേന്ദ്രത്തിൽ നടക്കുന്ന കോൺക്ലേവ് കാസർകോട് സ്‌പെഷ്യൽ ബ്രാഞ്ച് ഡിവൈ എസ് പി ഡോ. വി ബാലകൃഷ്ണൻ ഉദ്ഘാടനം ചെയ്യും.

വനിതാ കമ്മിഷൻ മെഗാ അദാലത്ത് 22ന്

കേരള വനിതാ കമ്മിഷൻ മെഗാ അദാലത്ത് ആഗസ്റ്റ് 22ന് രാവിലെ 10 മണി മുതൽ ജില്ലാ പഞ്ചായത്ത് ഹാളിൽ നടക്കും.

ഭവന പുനരുദ്ധാരണ വായ്പക്ക് അപേക്ഷിക്കാം

സംസ്ഥാന പട്ടികജാതി പട്ടികവർഗ്ഗ വികസന കോർപ്പറേഷൻ ഭവന പുനരുദ്ധാരണ പദ്ധതി പ്രകാരം പട്ടികജാതി പട്ടികവർഗക്കാരിൽ നിന്നും അപേക്ഷ ക്ഷണിച്ചു. അഞ്ച് ലക്ഷം രൂപ വരെയാണ് അനുവദിക്കുക. പ്രായപരിധി 18 നും 55നും  ഇടയിൽ. അഞ്ച് ലക്ഷം രൂപയ്ക്ക് ഏഴ് ശതമാനമാണ് പലിശ. തുക 72 തുല്ല്യ മാസ ഗഡുക്കളായി (പിഴപ്പലിശയുണ്ടെങ്കിൽ  അതും  സഹിതം) തിരിച്ചടക്കണം. അപേക്ഷ ഫോറത്തിനും  വിശദ  വിവരങ്ങൾക്കും കോർപ്പറേഷന്റെ ജില്ലാ ഓഫീസുമായി  ബന്ധപ്പെടുക. ഫോൺ: 04972705036,  9400068513.

റാങ്ക് ലിസ്റ്റ് പ്രസിദ്ധീകരിച്ചു

ജില്ലയിൽ വിവിധ വകുപ്പുകളിൽ ഡ്രൈവർ കം ഓഫീസ് അറ്റൻഡന്റ് (എച്ച് ഡി വി) തസ്തികയിലേക്ക് (സ്‌പെഷ്യൽ റിക്രൂട്ട്‌മെന്റ് എസ് സി/എസ് ടി ആന്റ് എസ് ടി മാത്രം-482/2021) പി എസ് സി 2022 സെപ്റ്റംബർ അഞ്ചിന് നടത്തിയ ഒ എം ആർ പരീക്ഷയുടെയും 2023 മെയ് 18 മുതൽ 25 വരെ നടത്തിയ പ്രാക്ടിക്കൽ ടെസ്റ്റിന്റെയും അടിസ്ഥാനത്തിൽ തയ്യാറാക്കിയ റാങ്ക് ലിസ്റ്റ് പ്രസിദ്ധീകരിച്ചതായി ജില്ലാ പി എസ് സി ഓഫീസർ അറിയിച്ചു.