കോഹ്ലി തകർത്തു : റോയൽ ചലഞ്ചേഴ്സിന് വിജയം
ക്യാപ്റ്റൻ വിരാട് കോഹ്ലി ഫോം കണ്ടെത്തിയ മത്സരത്തിൽ ചെന്നൈ സൂപ്പർ കിംഗ്സിനെതിരേ റോയൽ ചലഞ്ചേഴ്സ് ബംഗളൂരുവിന് 37 റൺസ് വിജയം. ബംഗളൂരുവിന്റെ 170 റൺസ് വിജയലക്ഷ്യം പിന്തുടർന്ന ചെന്നൈയ്ക്ക് എട്ട് വിക്കറ്റ് നഷ്ടത്തിൽ 132 റൺസ് മാത്രമാണ് നേടാനായത്.
ചെന്നൈയ്ക്കായി അമ്പാട്ടി റായിഡുവും (42) നാരായൺ ജഗദീശനും (33) മാത്രമാണ് ഭേദപ്പെട്ട പ്രകടനം നടത്തിയത്. ഇരുവരും ചേർന്ന് 64 റൺസ് കൂട്ടുകെട്ടുണ്ടാക്കി. എന്നാൽ മറ്റൊരു മികച്ച കൂട്ടുകെട്ട് ചെന്നൈയ്ക്കു സാധിച്ചില്ല. വാട്സണും (14) ധോണിയുമാണ് (10) അടുത്ത ടോപ്സ്കോററുമാർ.
നേരത്തെ കോഹ്ലിയുടെ കരുത്തിലാണ് ബംഗളൂരു ഭേദപ്പെട്ട സ്കോർ സമ്പാദിച്ചത്. കോഹ്ലി 52 പന്തിൽ നാല് സിക്സും നാല് ഫോറും അടക്കം 90 റണ്സുമായി പുറത്താകാതെനിന്നു. ദേവ്ദത്ത് പടിക്കൽ (34 പന്തിൽ 33), ശിവം ദുബെ (14 പന്തിൽ 22 നോട്ടൗട്ട്) എന്നിവരാണ് ആർസിബി ഇന്നിംഗ്സിലേക്ക് കൂടുതൽ സംഭാവന നൽകിയ രണ്ടുപേർ.
രണ്ടാം വിക്കറ്റിൽ കോഹ്ലി-ദേവ്ദത്ത് കൂട്ടുകെട്ട് 53ഉം അഞ്ചാം വിക്കറ്റിൽ കോഹ്ലി-ദുബെ കൂട്ടുകെട്ട് 76നും റണ്സ് നേടി. മത്സരത്തിൽ ഐപിഎലിൽ 50 ക്യാച്ച് എന്ന നാഴികക്കല്ലിൽ സിഎസ്കെയുടെ ഫാഫ് ഡുപ്ലെസി എത്തി.