സുപ്രീം കോടതി ജസ്റ്റീസ് ദീപക് ഗുപ്തയ്ക്ക് വീഡിയോ കോണ്ഫറന്സിംഗിലൂടെ യാത്രയയപ്പ്
ന്യൂഡല്ഹി: സുപ്രീം കോടതിയില് നിന്നും വിരമിക്കുന്ന ജസ്റ്റീസ് ദീപക് ഗുപ്തയ്ക്ക് കോവിഡ് പ്രതിസന്ധിയുടെ പശ്ചാത്തലത്തില് വീഡിയോ കോണ്ഫറന്സിംഗ് വഴി യാത്രയയപ്പ് നല്കി.
സുപ്രീം കോടതിയുടെ ചരിത്രത്തില് ആദ്യമായാണ് ജസ്റ്റീസിന്റെ യാത്രയയപ്പ് ചടങ്ങ് വീഡിയോ കോണ്ഫറന്സിംഗ് വഴി നടത്തുന്നത്. സുപ്രീം കോടതി ബാര് അസോസിയേഷനും സൂം ആപ്പിലൂടെ വിര്ച്വല് യാത്രയയപ്പാണ് നല്കിയത്.
ചടങ്ങില്, ഭരണഘടനയാണ് ജഡ്ജിമാരുടെ വിശുദ്ധപുസ്തകം, ജഡ്ജിമാര് കോടതിയില് ഇരിക്കുമ്പോള് മതവിശ്വാസങ്ങളെല്ലാം മറക്കണമെന്നും അവരുടെ ഗീതയും ഖുര്ആനും ബൈബിളുമെല്ലാം ഭരണഘടനയാണെന്ന് അദ്ദേഹം പറഞ്ഞു.
2017 ഫെബ്രുവരി 17നാണ് ദീപക് ഗുപ്ത സുപ്രീം കോടതി ജസ്റ്റീസായി നിയമിതനായത്. ദീപക് ഗുപ്ത ഹിമാചല് ഹൈക്കോടതി ജഡ്ജിയായും ത്രിപുര ഹൈക്കോടതി ചീഫ് ജസ്റ്റീസായും ചുമതല വഹിച്ചിട്ടുണ്ട്.