സംസ്ഥാനത്ത് ഞായറാഴ്ച കോവിഡ് 19 സ്ഥിരീകരിച്ച ഏഴ് പേരിൽ മൂന്ന് പേർ പ്രവാസികൾ
തിരുവനന്തപുരം: സംസ്ഥാനത്ത് ഞായറാഴ്ച കോവിഡ് 19 സ്ഥിരീകരിച്ച ഏഴ് പേരിൽ മൂന്ന് പേർ പ്രവാസികൾ. വ്യാഴാഴ്ച അബുദാബിയിൽനിന്നും തൃശൂർ, മലപ്പുറം ജില്ലകളിൽ എത്തിയവർക്കാണ് കോവിഡ് റിപ്പോർട്ട് ചെയ്തിരിക്കുന്നത്. ഇതോടെ സംസ്ഥാനത്ത് വിദേശത്തുനിന്ന് എത്തിയ അഞ്ച് പേർക്കാണ് കോവിഡ് സ്ഥിരീകരിച്ചത്.
വയനാട്ടിൽ രോഗം സ്ഥിരീകരിച്ച മൂന്ന് പേരിൽ രണ്ട് പേർക്ക് സന്പർക്കത്തിലൂടെയാണ് കോവിഡ് ഉണ്ടായത്. ചെന്നൈയിൽനിന്നും വയനാട്ടിലും എറണാകുളത്തും എത്തി ഒരോരുത്തർക്കുമാണ് കോവിഡ് റിപ്പോർട്ട് ചെയ്തിരിക്കുന്നത്. ഗൾഫിൽനിന്ന് പ്രത്യേക വിമാനത്തിൽ സംസ്ഥാനത്തെത്തിയ മലപ്പുറം സ്വദേശികളായ രണ്ടു പേർക്കാണ് നേരത്തെ കോവിഡ് സ്ഥിരീകരിച്ചത്.
സംസ്ഥാനത്ത് 20 പേരാണ് കോവിഡ് ചികിത്സയിലുള്ളത്. വിവിധ ജില്ലകളിലായി 26,712 പേര്‍ നിരീക്ഷണത്തിലുണ്ട്. ഇവരില്‍ 26,350 പേര്‍ വീടുകളിലും 362 പേര്‍ ആശുപത്രികളിലും നിരീക്ഷണത്തിലാണ്. 135 പേരെയാണ് ഇന്ന് ആശുപത്രിയില്‍ പ്രവേശിപ്പിച്ചത്. 37,464 സാമ്പിളുകൾ പരിശോധനയ്ക്ക് അയച്ചതിൽ 36,630 സാമ്പിളുകളുടെ പരിശോധനാഫലം നെഗറ്റിവ് ആണ്.
