നിയന്ത്രണങ്ങള്‍ കടുപ്പിച്ച്‌ ഉത്തര്‍പ്രദേശ്: 15 ജില്ലകള്‍ അടച്ചു, അവശ്യവസ്തുക്കള്‍ വീട്ടിലെത്തിക്കും
ലക്‌നൗ: കൊവിഡ് വ്യാപനത്തെ തുടര്‍ന്ന് ഉത്തര്‍പ്രദേശ് സമ്പൂര്‍ണ ലോക്ഡൗണിലേക്ക്. 15 ജില്ലകള്‍ പൂര്‍ണമായി അടച്ചിടാന്‍ യോഗി ആദിത്യനാഥ് സര്‍ക്കാര്‍ ഉത്തരവിട്ടു. ഏപ്രില്‍ 13 വരെ അഞ്ച് ദിവസത്തേക്ക് പൂര്‍ണമായും അടച്ചിടാനാണ് ഉത്തരവ്. ബുധനാഴ്ച അര്‍ധാത്രി മുതല്‍ ഉത്തരവ് പ്രാബല്യത്തില്‍ വരും.
അവശ്യവസ്തുക്കള്‍ വാങ്ങാന്‍ പോലും പുറത്തിറങ്ങാന്‍ കഴിയാത്തവിധമാണ് നിയന്ത്രണങ്ങള്‍ കടുപ്പിച്ചത്. ഇവര്‍ ഹോം ഡെലിവറിയെ ആശ്രയിക്കേണ്ടി വരും. നിലവില്‍ അനുവദിച്ചിട്ടുളള പാസുകള്‍ പുനഃപരിശോധനയ്ക്ക് വിധേയമാക്കുമെന്നും സര്‍ക്കാര്‍ വ്യക്തമാക്കുന്നു.
വാരാണസി ഉള്‍പ്പെടെയുളള ജില്ലകളെ അടച്ചിടാന്‍ തീരുമാനിച്ചത്. കാന്‍പൂര്‍, ആഗ്ര, ബുദ്ധാ നഗര്‍, ഗാസിയാബാദ്, സഹരാന്‍പൂര്‍, മീററ്റ്, സീതാപൂര്‍, ഫിറോസാബാദ്, ബറേലി, ഷാംലി എന്നിവയാണ് മറ്റു ജില്ലകള്‍. സംസ്ഥാനത്ത് കോവിഡ് കേസുകള്‍ വര്‍ധിക്കുന്ന പശ്ചാത്തലത്തിലാണ് നടപടി.
നിലവില്‍ സംസ്ഥാനത്ത് 334 പേര്‍ക്കാണ് കോവിഡ് ബാധ സ്ഥിരീകരിച്ചത്. 26 പേര്‍ക്ക് രോഗം ഭേദമായി. നാലുപേരാണ് ഇതുവരെ സംസ്ഥാനത്ത് രോഗം ബാധിച്ച്‌ മരിച്ചത്.
