കൊവിഡ് 19: ഐ.പി.എല്‍ മാറ്റിവെച്ചു
മുംബൈ: കൊവിഡ് 19 ബാധയുടെ പശ്ചാത്തലത്തില്‍ ഐപിഎല്‍ മത്സരങ്ങള്‍ മാറ്റിവച്ചു. മാര്‍ച്ച്‌ 29ന് നടത്താനിരുന്ന മത്സരങ്ങളാണ് ഏപ്രില്‍ 15ലേക്ക് ഐപിഎല്‍ മാറ്റിവച്ചിരിക്കുന്നത്.
ബി.സി.സി.ഐയാണ് ഇക്കാര്യം അറിയിച്ചത്. പൊതുജനങ്ങളുടെ ആരോഗ്യവും സുരക്ഷയും പരിഗണിച്ചാണ് ഇത്തരമൊരു തീരുമാനമെടുത്തതെന്ന് ബി.സി.സി.ഐ പത്രക്കുറിപ്പില്‍ വ്യക്തമാക്കുന്നു. ഐ.പി.എല്ലുമായി ബന്ധപ്പെട്ട് കേന്ദ്രസര്‍ക്കാറുമായും വിവിധ വകുപ്പുകളുമായി നിരന്തരമായി സമ്ബര്‍ക്കം പുലര്‍ത്തുന്നുണ്ടെന്നും ബി.സി.സി.ഐ വ്യക്തമാക്കുന്നു.
ബി.സി.സി.ഐ പ്രസിഡന്‍റ് സൗരവ് ഗാംഗുലിയുടേയും സെക്രട്ടറി ജയ് ഷായുടേയും നേതൃത്വത്തില്‍ വെള്ളിയാഴ്ച നടക്കുന്ന ഐ.പി.എല്‍ ഗവേണിങ് കൗണ്‍സില്‍ യോഗത്തിലാണ് ഇതുമായി ബന്ധപ്പെട്ട തീരുമാനമുണ്ടായത്. കോവിഡ് 19 വൈറസ് ബാധയുടെ പശ്ചാത്തലത്തില്‍ ഏപ്രില്‍ 15 വരെ വിസകള്‍ക്ക് ഇന്ത്യന്‍ സര്‍ക്കാര്‍ നിയന്ത്രണമേര്‍പ്പെടുത്തിയിരുന്നു. ഇതോടെ വിദേശതാരങ്ങള്‍ക്ക് ഐ.പി.എല്ലില്‍ പങ്കെടുക്കാന്‍ കഴിയാത്ത സാഹചര്യമാണ് നിലനില്‍ക്കുന്നത്.
അതേസമയം, ഐ.പി.എല്ലിലെ മല്‍സരങ്ങള്‍ കുറക്കില്ലെന്നാണ് സൂചന. നേരത്തെ ഡല്‍ഹിയില്‍ ഐ.പി.എല്‍ മല്‍സരങ്ങള്‍ക്ക് അനുമതി നല്‍കാനാവില്ലെന്ന് ഉപമുഖ്യമന്ത്രി മനീഷ് സിസോദിയ പറഞ്ഞിരുന്നു.
